पुणे रेल्वे स्थानकातील सुरक्षा यंत्रणा अत्यंत कमकुवत; समस्येची मेधा कुलकर्णी यांच्याकडून पाहणी

पुणे रेल्वे स्थानकातील सुरक्षा व्यवस्था तातडीने मजबूत करावी. हलगर्जीपणा करणाऱ्यांवर कारवाई करावी, अशा सूचना मेधा कुलकर्णी यांनी दिल्या आहेत

पुणे : रेल्वेस्थानकावर प्रवाशांना येणाऱ्या अडचणी, समस्या याची दखल घेत राज्यसभा खासदार डाॅ. मेधा कुलकर्णी यांनी गुरुवारी (दि. २३) पुणे रेल्वेस्थानकाची पाहणी केली. त्यानंतर विभागीय रेल्वे व्यवस्थापक (डीआरएम) राजेश वर्मा यांची भेट घेऊन स्थानक परिसरात रेल्वे विभागाने केलेल्या उपयायोजनांची माहिती घेत समस्यांबाबत चर्चा केली.

रेल्वेस्थानक परिसरात पाहणी करताना स्थानकात विनातिकीट फिरणाऱ्यांची संख्या अधिक असल्याचे दिसून आले. सुरक्षा यंत्रणा अत्यंत कमकुवत असल्याचे सांगत प्रा. डाॅ. मेधा कुलकर्णी म्हणाल्या, घटना घडून गेल्यानंतरच त्रुटी शोधण्यापेक्षा त्या आधीच शोधून त्यावर गांभीर्याने निर्णय घ्यावेत. पुणे रेल्वे स्थानकातील सुरक्षा व्यवस्था तातडीने मजबूत करावी. हलगर्जीपणा करणाऱ्यांवर कारवाई करावी, अशा सूचना मेधा कुलकर्णी यांनी राजेश वर्मा यांना दिल्या. स्थानक परिसरात व्यसनाधीन व्यक्तींची वर्दळ, चोरी, अत्याचार यासारख्या घटना वारंवार घडत असून, हे अत्यंत गंभीर आहे. या सर्व प्रकारांना जबाबदार असणाऱ्यांवर कठोर कारवाई करावी. यावेळी सीसीटीव्ही कॅमेऱ्यांसाठी निधी उपलब्ध झाल्याचे समाधान व्यक्त केले, तर स्थानकावर तिकीट तपासणी करणारे अधिकारी (टीसी) अपुरे असून, ती संख्या वाढवावी. स्थानकावरील स्टॉल वाटप प्रक्रियेत स्थानिकांना प्राधान्य द्यावे, असेही कुलकर्णी यांनी सांगितले. यावेळी स्थानिक कार्यकर्ते अनिल परदेशी यांच्यासह रेल्वेचे अधिकारी उपस्थित होते.