Pune Crime : खंडणी प्रकरणात मोठी कारवाई! पुण्यातील ३ पोलिस कर्मचारी थेट सेवेतून बडतर्फ

Pune Crime - पोलिस उपनिरीक्षक अजित बडे, दामिनी मार्शल सोनाली हिंगे आणि कर्मचारी सुदाम तायडे… खात्यातून बडतर्फ.

पुणे - शहरातील पोलिस दलावर पुन्हा एकदा गंभीर प्रश्नचिन्ह निर्माण करणारी धक्कादायक घटना समोर आली आहे. एका ५५ वर्षीय प्राचार्यांना गुन्ह्यात अडकवून अटक करण्याची धमकी देत तब्बल ७ लाख रुपये उकळल्याचा आरोप पुणे पोलिस दलातील तिघांवर करण्यात आला आहे. या प्रकरणामुळे पोलिस विभागात मोठी खळबळ उडाली असून नागरिकांमध्ये संताप व्यक्त केला जात आहे.माहितीनुसार, पोलिस उपनिरीक्षक अजित बडे, दामिनी मार्शल सोनाली हिंगे आणि कर्मचारी सुदाम तायडे यांनी संबंधित प्राचार्यांना खोट्या गुन्ह्यात अडकवण्याची भीती दाखवली. अटकेची कारवाई होईल, अशी धमकी देत त्यांनी टप्प्याटप्प्याने लाखो रुपयांची मागणी केल्याचा आरोप आहे. भीतीपोटी प्राचार्यांनी सुमारे ७ लाख रुपये दिल्याचे समोर आले आहे.घटनेची माहिती वरिष्ठ पोलिस अधिकाऱ्यांपर्यंत पोहोचल्यानंतर या प्रकरणाची तातडीने चौकशी सुरू करण्यात आली. प्राथमिक तपासात आरोपांमध्ये तथ्य आढळल्याने संबंधित तिन्ही कर्मचाऱ्यांवर कठोर कारवाई करण्यात आली आहे. पोलिस प्रशासनाने त्यांना सेवेतून बडतर्फ केल्याची माहिती सूत्रांनी दिली.दरम्यान, बंडगार्डन पोलीस स्टेशन हद्दीत या प्रकरणाचा पुढील तपास सुरू असून संबंधितांविरोधात गुन्हा दाखल करण्याची प्रक्रिया सुरू करण्यात आली आहे. तपासादरम्यान आणखी काही धक्कादायक बाबी समोर येण्याची शक्यता व्यक्त केली जात आहे.या घटनेमुळे पुणे पोलिसांच्या कार्यपद्धतीवर प्रश्न उपस्थित होत असून, कायद्याचे रक्षकच जर अशा प्रकारे नागरिकांना धमकावून पैसे उकळत असतील तर सर्वसामान्यांनी न्यायासाठी कुणाकडे पाहायचे, असा सवाल उपस्थित केला जात आहे. दोषींवर कठोर कारवाई करून पोलिस दलातील भ्रष्ट प्रवृत्तींना आळा घालण्याची मागणी आता जोर धरू लागली आहे.