Pune Crime आरटीओच्या दंडात्मक कारवाईचे बनावट चलन पाठवून एकाला अडीच लाखांचा गंडा; सायबर चोरट्यांविरुद्ध गुन्हा

पुणे : प्रादेशिक परिवहन विभागाकडून (आरटीओ) दंडात्मक कारवाई करण्यासंबंधी बनावट ई-चलनची एपीके फाइल पाठवून एकाची दोन लाख ६० हजार रुपयांची फसवणूक करण्यात आली. याप्रकरणी सायबर चोरट्यांविरुद्ध भारती विद्यापीठ पोलिसांनी गुन्हा दाखल केला.

याबाबत एकाने भारती विद्यापीठ पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार हे कात्रजमधील खोपडेनगर भागात राहायला आहेत. सायबर चोरट्यानी त्यांच्या मोबाइल क्रमांकावर ‘आरटीओ’च्या नावे दंडात्मक कारवाईच्या बनावट चलनची एपीके फाइल पाठवली.

त्याद्वारे सायबर चोरट्यांनी तक्रारदाराच्या मोबाइलचा ॲक्सेस घेऊन आधारकार्ड, बँक खात्याची गोपनीय माहिती चोरली. या माहितीचा गैरवापर करून बँक खात्यातून दोन लाख ६० हजार रुपयांची रोकड लंपास केली. वरिष्ठ पोलिस निरीक्षक राहुल खिलारे तपास करत आहेत.