...कोणाला जबाबदार धरू नये' व्हाॅट्सअपवर मेसेज करून तरुणाची खडकवासल्यात उडी

मेसेज केल्यानंतर अनेकदा त्याला संपर्क करण्याचा प्रयत्न केला पण तरुणाचा मोबाईल बंद होता

धनकवडी : मी आत्महत्या करत आहे, कोणाला जबाबदार धरू नये, असा आत्महत्येचा मेसेज व्हॉट्सअपवर पाठवून तरुणाने खडकवासलाधरणामध्ये उडी घेत आत्महत्या केली. ही घटना शुक्रवारी उघडकीस आली.

अनिकेत सुनील आल्हाट (वय २१, रा. नऱ्हे) असे मृत तरुणाचे नाव आहे. त्याचा मृतदेह शुक्रवारी खडकवासलाधरणाच्या पंप हाऊसजवळ सापडला. अनिकेत गुरुवारपासून (दि. २५ ) बेपत्ता होता. घरात काही न सांगता तो निघून गेला होता. आपण आत्महत्या करत असून त्यास कुणालाही जबाबदार धरू नये, या आशयाची चिठ्ठी त्याने मृत्यूपूर्वी लिहिली होती. ती त्याने एका मित्राला व्हॉट्सअपवर पाठवली होती आणि मोबाइल बंद करून तो गेला.

अनिकेतच्या मित्राने त्याच्या कुटुंबीयांना ही बाब सांगितली, त्यांनी अनेकदा त्याला संपर्क करण्याचा प्रयत्न केला; पण त्याचा मोबाइल बंद होता. त्यानंतर नातेवाइकांनी भारती विद्यापीठ पोलिस ठाण्यात धाव घेतली. दरम्यान, शुक्रवारी सकाळी पोलिसांना खडकवासला धरणात एक मृतदेह तरंगत असल्याची माहिती मिळाली. त्यानुसार हवेली पोलिस ठाण्याचे पथक तेथे पोहचले. त्यांनी स्थानिक नागरिकांच्या मदतीने मृतदेह बाहेर काढला. त्याच्या खिशात मोबाइल आढळला. त्यातील सिम दुसऱ्या मोबाइलमध्ये टाकून पोलिसांनी त्यांच्या नातेवाइकांना फोन केला. त्यानंतर या संपूर्ण गोष्टीचा उलगडा झाला. अनिकेतच्या आत्महत्येचे कारण अद्याप स्पष्ट झालेले नाही.