पुणे : पुणे रेल्वे स्थानकाचे नाव बदलून थोरले बाजीराव पेशवे यांचे नाव द्या, अशी मागणी भाजपच्या राज्यसभा खासदार मेधा कुलकर्णी यांनी दोन दिवसांपूर्वी केली होती. या मागणीवरून वाद निर्माण झाला असून, आता पुणे रेल्वे स्थानकाला महात्मा ज्योतिबा फुले यांचे नाव देण्यात यावे, या मागणीसाठी वंचित बहुजन आघाडीच्या वतीने पुणे रेल्वे विभागीय कार्यालयासमोर बुधवारी (दि. २५) आंदोलन करण्यात आले. यावेळी रेल्वे अधिकाऱ्यांना निवेदन सादर करण्यात आले.
यावेळी वंचित बहुजन आघाडीचे पुणे शहर अध्यक्ष ॲड. अरविंद तायडे, महासचिव विश्वास गदादे, महिला आघाडी अध्यक्षा अनिता चव्हाण, माथाडी अध्यक्ष विशाल कसबे, सम्यक विद्यार्थी अध्यक्ष चैतन्य इंगळे आदी उपस्थित होते.
पुणे रेल्वे स्थानकाला थोरले बाजीराव पेशवे यांचे नाव देण्यात यावे, अशी मागणी कुलकर्णी यांच्याकडून करण्यात आली होती. त्यांच्या या वक्तव्यामुळे राजकीय आणि सामाजिक क्षेत्रात जोरदार चर्चा होत आहे. वंचित बहुजन आघाडीने याबाबत आक्रमक भूमिका घेतली आहे. पुणे रेल्वे स्थानकाला महात्मा फुले यांचे नाव देण्यात यावे, अशी मागणी केली आहे. मागणी मान्य न झाल्यास तीव्र आंदोलन करण्याचा इशारा देण्यात आला आहे.