पुणे : भारती विद्यापीठ पोलिसांकडील तक्रार मागे घ्यावी व दुसऱ्या पत्नीला घटस्फोट द्यावा, यासाठी खेडचे माजी उपसभापती यांना ५० लाख रुपयांची खंडणी छोट्या राजनची सख्खी पुतणी प्रियदर्शनी निकाळजे हिने मागितल्याचा धक्कादायक प्रकार समोर आला आहे. त्यापैकी २५ लाख रुपयांची खंडणीची रक्कम घेण्यासाठी आलेला छोट्या राजनचा हस्तक धीरज साबळे याला खंडणीविरोधी पथकाने सापळा रचून अटक केली आहे. धीरज बाळासाहेब साबळे (वय २६, रा. धानोरे, ता. खेड), प्रियदर्शनी निकाळजे (रा. जांभूळकर नगर, वानवडी) आणि मंदार वाईकर (निधिषा सोसायटी, मार्केट यार्ड) अशी गुन्हा दाखल केलेल्यांची नावे आहेत.
याप्रकरणी खेडच्या माजी उपसभापती राजेश वसंतराव जवळेकर (वय ४८, रा़ भाग्यतारा सोसायटी, कात्रज) यांनी खंडणीविरोधी पथकाकडे फिर्याद दिली आहे.
धीरज साबळे याला पोलिसांनी शनिवारी न्यायालयात हजर केले. प्रथमवर्ग न्यायदंडाधिकारी टी़ व्ही़ क्षीरसागर यांनी धीरज साबळे याला १६ मार्चपर्यंत पोलीस कोठडी सुनावली.
छोटा राजन आणि माझा डीएनए एकच
जवळेकर हे धीरज साबळेच्या सांगण्यानुसार प्रियदर्शनी निकाळजे यांना भेटायला गेले होते. तेव्हा प्रियदर्शनी निकाळजे हिने ‘छोटा राजनची मी सख्खी पुतणी आहे. आमचा डीएनए एकच आहे. जीव प्यारा असेल तर मी सांगितलेले ऐक. भारती विद्यापीठ पोलीस ठाण्यातून फोन आला तर मी सांगितल्याशिवाय जायचे नाही. मी पैसे पोच झाल्यानंतरच अर्ज मागे घेईन,’ असा दम भरला. यानंतर तिने हाताखाली काम करणाºया एकाला गाडीतून पर्स आणण्यास सांगितले. त्यातून पिस्तुल काढून फिर्यादीवर रोखले. ‘माझे ऐकले नाही तर यातील दहाच्या दहा गोळ्या घालून ठार मारीन,’ अशी धमकी दिली.
धीरज साबळे हा पोलिसांचा मुलगा आहे. त्याचे वडील सध्या पिंपरी-चिंचवड पोलीस आयुक्तालयात कार्यरत आहेत. तर, मंगेश वाईकर हा छोटा राजनचा राइट हँड म्हणून ओळखला जातो. तो सराईत गुन्हेगार असून त्याच्यावर यापूर्वीच मारामारीचे तीन गुन्हे आहेत. प्रियदर्शनी निकाळजे हिच्याविरुद्ध पुण्यातील हा पहिलाच गुन्हा आहे.
०००
अभिनेत्री आणि मॉडेल यांचीही होणार चौकशी
मराठी अभिनेत्रीने २०१५मध्ये फिर्यादी जवळेकर यांच्याशी नोंदणी पद्धतीने विवाह केला आहे़ त्यांनी त्याअगोदर तीन ते चार मराठी चित्रपटांत काम केले आहे, तर तिची बहीण मॉडेल म्हणून काम करते़ गेल्या ६ महिन्यांपासून ती मंदार वाईकर याच्याशी संपर्कात आली आहे. पतीने मर्सिडीस कार घेऊन दिली नाही; तसेच आता तिला घटस्फोट हवा असल्याने तिने प्रियदर्शनी निकाळजे हिच्याशी संपर्क साधला़ त्यामुळे आता या दोघीही अडचणीत आल्या असून पोलीस त्यांच्याकडे चौकशी करण्याची शक्यता आहे़