दोघेही दारूच्या नशेत; वडिलांना पेटवून देऊन केला खून, पुण्याच्या दांडेकर पुलावरील धक्कादायक प्रकार

दारूच्या नशेत असताना दोघांमध्ये भांडणे झाली. त्यावेळी रागाच्या भरात मुलाने वडिलांच्या अंगावर पेट्रोल टाकून पेटवून दिले

पुणे : दारूच्या नशेत मुलाने वडिलांचा पेटवून देऊन खून केल्याचा प्रकार नुकताच दांडेकर पूल परिसरात घडला. यासंदर्भात पर्वती पोलिस ठाण्यात खुनाचा गुन्हा दाखल करण्यात आला आहे.

रवींद्र उद्धव भालेराव (६१, रा. सर्व्हे क्र. १३० दांडेकर पूल) असे मृताचे नाव आहे. त्यांचा खून केल्याच्या आरोपावरून त्यांचा मुलगा सागर (२८) याच्याविरुद्ध गुन्हा दाखल करण्यात आला आहे. भालेराव सुतारकाम करून उदरनिर्वाह करत असत. मुलगा सागर हाही छोटी मोठी कामे करतो. दोघांनाही दारूचे व्यसन होते. दारूच्या नशेत असताना शनिवारी (दि. ७) दोघांमध्ये भांडणे झाली. त्यावेळी रागाच्या भरात सागरने वडिलांच्या अंगावर पेट्रोल टाकून पेटवून दिले. या घटनेत भालेराव गंभीररीत्या भाजले. आग भडकल्याने सागरने आग आटोक्यात आणून त्यांना ससून रुग्णालयात दाखल केले. ते पन्नास टक्के भाजले असल्याचे वैद्यकीय तपासणीत स्पष्ट झाले. तेथे उपचार सुरू असताना मंगळवारी (दि. ११) मध्यरात्री भालेराव मरण पावले. या प्रकरणी पर्वती पोलिस ठाण्यात गुन्हा दाखल करण्यात आला असून सहायक पोलिस निरीक्षक सुभाष महाले पुढील तपास करत आहेत.