पुणे : नातेसंबंधातील प्रेमप्रकरणाला विरोध करण्यात आल्याने गावाहून पळून आलेल्या तरुणाने प्रेयसीचा खून करून आत्महत्या केल्याची धक्कादायक घटना उघडकीस आली. हडपसर भागातील एका हाॅटेलमध्ये ही घटना घडली.
मोनिका कैलास खंडारे (२४) असे खून झालेल्या तरुणीचे नाव आहे. तिचा चादरीने गळा आवळून खून करण्यात आल्याचा प्रकार उघडकीस आला आहे. तिचा खून करून प्रियकर आकाश अरुण खंडारे (३०) याने गळफास घेऊन आत्महत्या केल्याचा प्रकार उघडकीस आला आहे. याप्रकरणी हडपसर पोलिस ठाण्यात गुन्हा दाखल करण्यात आला असून, सहायक पोलिस निरीक्षक उमेश राेकडे यांनी फिर्याद दिली आहे.
मोनिका आणि आकाश मूळचे अकोला जिल्ह्यातील बाळापूर तालुक्यात असलेल्या कसुरा गावचे रहिवासी होते. दोघे नातेवाईक असून, त्याचे प्रेमसंबंध होते. मोनिका आणि आकाशच्या प्रेमसंबंधाला कुटुंबीयांचा विरोध होता. आकाश शेती करायचा. मोनिका नोकरी करत होती. त्यांच्या प्रेमप्रकरणाला विरोध होत असल्याने त्यांनी यापूर्वी आत्महत्या करण्याचा प्रयत्न केला होता. दोघे जण गावाहून पळून पुण्यात आले होते. हडपसर भागातील मांजरी-मुंढवा रस्त्यावर असलेल्या स्पाॅटलाईट हाॅटेलमध्ये दोघांनी खोली भाड्याने घेतली होती. १३ मे रोजी मध्यरात्री आकाशने मोनिकाचा चादरीने गळा आवळून खून केला. त्यानंतर त्याने खोलीतील पंख्याला चादर बांधून गळफास घेतला. दोघे जण मृतावस्थेत सापडल्याची माहिती हाॅटेलमधील कर्मचाऱ्यांनी पोलिसांना दिली. सहायक पोलिस निरीक्षक अश्विनी राख, हडपसर पोलिस ठाण्याचे वरिष्ठ पोलिस निरीक्षक संतोष पांढरे, गुन्हे शाखेचे निरीक्षक उमेश गिते यांनी घटनास्थळी भेट दिली.
पोलिसांनी याप्रकरणाचा तपास सुरू केला. पोलिसांनी कुटुंबीयांची चौकशी करण्यात आली. मोनिका आणि आकाशचे प्रेमसंबंध होते. दोघेही नात्यातील आहेत. प्रेमसंबंधाला विरोध केल्याने दोघे जण पुण्यात पळून आले होते. नातेसंबंधातील प्रेमप्रकरणाला विरोध केल्याने त्यांनी आत्महत्या केल्याची माहिती पोलिसांनी दिली. पोलिस निरीक्षक गिते पुढील तपास करत आहेत.