अभ्यासाच्या तणावातून १२ वीच्या विद्यार्थ्याने जीवनयात्रा संपवली; हॉल तिकीट आणलं अन् तासाभरातच...

प्रणय हा भोसरीतील राजमाता जिजाऊ महाविद्यालयात विज्ञान शाखेत इयत्ता बारावीमध्ये शिक्षण घेत होता.

पिंपरी : अभ्यासाचा तणाव आणि परीक्षेच्या भीतीतून बारावीच्या वर्गात शिकणाऱ्या एका १७ वर्षीय विद्यार्थ्याने आत्महत्या केल्याची घटना शुक्रवारी (दि ६) दुपारी उघडकीस आली आहे. भोसरी संत तुकारामनगरात घटना घडली. प्रणय सुनील खैरे (१७, संत तुकारामनगर, भोसरी) असे आत्महत्या केलेल्या विद्यार्थ्याने नाव आहे.

भोसरी पोलिसांनी दिलेल्या माहितीनुसार, प्रणय हा भोसरीतील राजमाता जिजाऊ महाविद्यालयात विज्ञान शाखेत इयत्ता बारावीमध्ये शिक्षण घेत होता. कॉलेजमधील प्रकल्प अपूर्ण राहिल्याने तसेच प्रात्यक्षिक परीक्षा न दिल्यामुळे तो चिंतेत होता.

आईसोबत आज प्रणय हा राजमाता जिजाऊ महाविद्यालयात परिक्षेचे हॉल तिकीट आणण्यासाठी गेला होता. परतल्यानंतर आई बँकेत कामावर गेली, तर वडील गावी गेले होते, असे नातेवाईकांनी सांगितले.

आत्महत्या घटनेमुळे परिसरात हळहळ

घरात एकटा असताना प्रणयने टोकाचा निर्णय घेतला. याबाबत गुन्हा दाखल करण्याचे काम सुरू आहे. आत्महत्येचे नेमके कारण स्पष्ट झाले नसून भोसरी पोलीस तपास करीत आहेत. आत्महत्या घटनेमुळे परिसरात हळहळ व्यक्त होत आहे.