जिंतूर (जि. परभणी): देवदर्शनासाठी उज्जैनकडे निघालेल्या भाविकांच्या वाहनाचा परभणी - जिंतूर मार्गावरील अकोली पुलाजवळ भीषण अपघात झाल्याची घटना गुरुवारी (दि. १२) मध्यरात्रीच्या सुमारास घडली. यात चार जणांचा जागीच मृत्यू झाला, तर एक जण गंभीर जखमी झाला आहे. या घटनेमुळे गंगाखेड, जिंतूर परिसरात शोककळा पसरली आहे.
बालाजी आश्रोबा औटी (२८, रा. खडकपुरा), बालाप्रसाद उत्तमराव घोरपडे (३०, रा. तारुमोहल्ला) कृष्णा बालाजी गुट्टे (२८, रा. कोद्री रोड), रोहन संजय राठोर (२७, रा. लक्ष्मीनगर) अशी मयतांची नावे आहेत. तर गोपाळ गणेश रोकडे (२८, रा. खडकपुरा) गंभीर जखमी झाला आहे.
परभणी जिल्ह्यातील गंगाखेड येथील पाच भाविक कार (क्र. एमएच १४ केएफ २७९०) गंगाखेडहून जिंतूरमार्गे उज्जैन येथे देवदर्शनासाठी जात होते. जिंतूर शहरापासून सुमारे दोन किलोमीटर अंतरावरील अकोली पुलाजवळ येताच चालकाचा वाहनावरील ताबा सुटल्याने अपघात झाला. अपघात इतका भीषण होता की मोठा आवाज ऐकून परिसरातील ग्रामस्थांनी घटनास्थळी धाव घेतली. सामाजिक कार्यकर्ते नागेश आकात, १०८ रुग्णवाहिकेचे डॉ. घुगे व चालक पवार यांनी तत्काळ मदतकार्य सुरू करून जखमींना जिंतूर ग्रामीण रुग्णालयात दाखल केले. वैद्यकीय अधिकारी डॉ. शेख मुद्दसीर व रुग्णकक्ष सेवक गंगाधर पालवे यांनी तपासणी केल्यानंतर बालाजी औटी, बालाप्रसाद घोरपडे, कृष्णा गुट्टे, रोहन राठोर या चौघांना मृत घोषित केले, तर गोपाळ रोकडे गंभीर जखमी झाल्याने त्याच्यावर प्राथमिक उपचार करून पुढील उपचारासाठी जिल्हा रुग्णालयात हलविण्यात आले. ऐन तारुण्यात चार जणांचा मृत्यू झाल्याच्या घटनेने गंगाखेड शहरात शोककळा पसरली आहे.
चालक घटनास्थळावरून पसार
अपघात घडताच वाहनचालक अभिजित शिंगाडे (रा. धनगरमोहा, ता. गंगाखेड) हा घटनास्थळावरून पसार झाला. बीट जमादार दत्तात्रय गुंगाणे यांच्या फिर्यादीवरून चालकाविरुद्ध गुन्हा दाखल झाला आहे. तपास सपोनि विजय जाधव करीत आहेत.
अधीक्षकांकडून घटनास्थळाची पाहणी
घटनेची माहिती मिळताच पोलिस निरीक्षक गजेंद्र सरोदे, बीट जमादार दत्तात्रेय गुंगाणे, मेजर थोरवे व पोलिस वाहनचालक पैठणे घटनास्थळी दाखल झाले. दरम्यान, पोलिस अधीक्षक रवींद्र परदेशी यांनी घटनास्थळी व रुग्णालयाला भेट देऊन परिस्थितीची पाहणी केली.
Web Summary : Four friends died and one was injured in a car accident near Akoli bridge in Parbhani district. The driver lost control of the vehicle. The driver fled the scene; police are investigating.
Web Summary : परभणी जिले के अकोली पुल के पास एक कार दुर्घटना में चार दोस्तों की मौत हो गई और एक घायल हो गया। ड्राइवर ने वाहन पर नियंत्रण खो दिया। ड्राइवर मौके से फरार हो गया; पुलिस जांच कर रही है।