पाथरी ( परभणी ) : गोदावरी नदीच्या पात्रातील नाथरा बंधाऱ्याच्याजवळ मंजरथ शिवारात 50 वर्षी अज्ञात व्यक्तीचे प्रेत रविवारी ( दि. 22 ) सायंकाळी आढळून आले. घटनास्थळी पोलीस अधिकारी पंचनामा केला असून पुढील तपास सुरु आहे.
तालुक्यातील मंजरथ येथील पोलीस पाटील अतकरे यांनी पाथरी पोलीस ठाण्यात रविवारी सायंकाळी गोदावरी नदीच्या पात्रात अनोळखी व्यक्तीचे प्रेत असल्याची माहिती दिली. माहितीवरून पाथरी पोलीस ठाण्याचे प्रभारी पोलीस निरीक्षक डी. जे. मुळे, पोलीस जमादार करे, पोलीस नायक एम. ए. मुजमुले हे नाथरा बंधाऱ्याच्याजवळ मंजरथ शिवारातील घटनास्थळी दाखल झाले. त्यावेळी पाण्यात तरंगत असलेले अंदाजे 50 वर्ष वय असलेली मृत व्यक्ती आढळून आली. सायंकाळी 4 वाजेच्या सुमारास गावकऱ्यांच्या मदतीने पात्रातील प्रेत बाहेर काढण्यात आले. पांढरे केस आणि दाढी, अंगात गुलाबी शर्ट आणि निळ्या रंगाची पँट असे मृतदेहाचे वर्णन आहे. याप्रकरणी पोलीस नायक मुजमुले यांनी दिलेल्या माहितीवरून आकस्मिक मृत्यूची नोंद करण्यात आली आहे.