इंग्लंड कसोटी मालिकेवर गांगुलीची भविष्यवाणी

मुंबई, दि. 3 - भारतीय क्रिकेट संघाचा माजी कर्णधार सौरभ गांगुलीने इंग्लंड कसोटी मालिकेवर भविष्यवाणी केली आहे. कसोटी मालिकेत भारत इंग्लंडवर सहजपणे विजय मिळवेल अशी भविष्यवाणी सौरभ गांगुलीने केली आहे. भारत आणि इंग्लंडमध्ये 9 नोव्हेंबरपासून पाच सामन्यांची कसोटी मालिका सुरु होत आहे. नुकत्याच मायदेशात झालेल्या ३ कसोटी सामन्यांच्या मालिकेत न्यूझीलंडला ३-० असा क्लीन स्विप दिल्याने भारतीय संघाचा आत्मविश्वास उंचावला आहे.

 

'भारतीय संघ सध्या उत्तम फॉर्ममध्ये आहे. न्यूझीलंडप्रमाणे अजून एकदा भारत व्हाईटवॉश देण्यासाठी तयार आहे अशी मला आशा आहे. इंग्लंड संघाने सावध राहायला हवं,' असं गांगुली बोलला आहे. 

 

 

इंग्लंड संघ ९ ते १३ नोव्हेंबर या कालावधीत खेळल्या जाणाऱ्या पहिल्या कसोटी सामन्यासाठी ५ नोव्हेंबर रोजी राजकोटला रवाना होणार आहे. मालिकेतील अन्य कसोटी सामने विशाखापट्टणम (१७ ते २१ नोव्हेंबर), मोहाली (२६ ते ३० नोव्हेंबर), मुंबई (८ ते १२ डिसेंबर) आणि चेन्नई (१६ ते २० डिसेंबर) येथे खेळल्या जाणार आहेत. 

 

 

भारतीय संघ : विराट कोहली (कर्णधार), मुरली विजय, अजिंक्य रहाणे, ईशांत शर्मा, मोहंमद शमी, गौतम गंभीर, रविचंद्रन आश्विन, रवींद्र जडेजा, जयंत यादव, हार्दिक पंड्या, उमेश यादव, करुण नायर, अमित मिश्रा, वृद्धिमान साहा आणि चेतेश्वर पुजारा.