भोपाळ - अपघाताच्या घटना या सातत्याने समोर येत असतात. मध्य प्रदेशच्या निवारी जिल्ह्यात एक धक्कादायक घटना घडली आहे. समोरून येणाऱ्या ऑटोरिक्षाला धडक बसू नये हा प्रयत्न करण्याच्या नादात कार चालकाचे गाडीवरील नियंत्रण सुटले आणि कारनदीत कोसळून अपघात झाला आहे. सुदैवाने या अपघातात कोणतीही जीवितहानी झालेली नसून कारमधील पाचही जणांना वाचवण्यात यश आले आहे. ही संपूर्ण घटना रस्त्यावरील सीसीटीव्ही कॅमेऱ्यात कैद झाली आहे. अंगावर काटा आणणाऱ्या अपघाताचा व्हिडीओ आता समोर आला असून तो जोरदार व्हायरल झाला आहे.
मिळालेल्या माहितीनुसार, मध्य प्रदेशच्या निवारी जिल्ह्यातील ओरछाजवळ समोरून भरधाव वेगाने येणाऱ्या ऑटोरिक्षाला कारची धडक बसू नये या प्रयत्नात कारचा अपघात झाला आहे. कारमधून 5 जण प्रवास करत होते. ऑटोरिक्षाची कारला धडक बसली. कार चालकाचे गाडीवरील नियंत्रण सुटले आणि कार नदीत कोसळली. कारमधील काही प्रवासी बाहेर आले. मात्र त्याचवेळी गाडीमध्ये एक लहान मुलगा देखील होता. चिमुरड्याचा जीव वाचवण्यासाठी कारमधील एका व्यक्तीने पाण्यातून मुलाला नदीवरील पुलावर उभ्या असेलल्या लोकांच्या दिशेने फेकले मात्र मुलगा नदीत पडला.
पुलावर उभ्या असलेल्या लोकांनी देखील घटनेचं गांभीर्य लक्षात घेऊन कार अपघातातील लोकांना मदतीचा हात दिला. लहान मुलगा पाण्यात पडलेला पाहताच पुलावर उपस्थित असलेल्या लोकांपैकी काहींनी नदीत उडी मारली आणि वाहून जाणाऱ्या मुलाला वाचवण्याचा प्रयत्न केला. तसेच त्यानंतर कारमध्ये अडकलेल्या पाचही जणांना वाचवण्यासाठी शर्थीचे प्रयत्न करण्यात आले. सुदैवाने या अपघातात कोणतीही जीवितहानी झालेली नाही. नदीतून सुखरुपरित्या सर्वांना बाहेर काढण्यात यश आले आहे.
अपघातातील सर्व व्यक्तींना उपचारासाठी तातडीने जवळच्या रुग्णालयात दाखल करण्यात आले असून सध्या त्यांच्यावर उपचार सुरू आहेत. ओरछाचे नरेंद्र त्रिपाठी यांनी दिलेल्या माहितीनुसार, कारमधून प्रवास करणारे सर्व प्रवासी हे उत्तर प्रदेशच्या उरईचे रहिवासी आहेत. उपचारासाठी त्यांना ओरछा स्वास्थ्य केंद्रात दाखल करण्यात आले आहे. अंगावर काटा आणणाऱ्या या अपघाताचा व्हिडीओ सोशल मीडियावर सध्या जोरदार व्हायरल होत आहे.