पाच राज्यांच्या भविष्याचा आज फैसला; प.बंगाल, तामिळनाडूच्या निकालावर नजरा

कौल कुणाला? सकाळी ८ वाजेपासून मतमोजणी

नवी दिल्ली/कोलकाता : देशाचे लक्ष लागून राहिलेल्या पाच राज्यांच्या विधानसभा निवडणुकांचा निकाल साेमवारी जाहीर होणार आहे. आसाम, केरळ, तामिळनाडू, पश्चिम बंगाल आणि पुदुचेरी या पाच राज्यांमध्ये मतमोजणीची जय्यत तयारी पूर्ण झाली असून, सकाळी ८ वाजल्यापासून मतमोजणीला सुरुवात होईल. दुपारपर्यंत सत्तेचे चित्र स्पष्ट होण्याची शक्यता असून, कोणाला कौल मिळणार, याबाबतची उत्सुकता शिगेला पोहोचली आहे.

भारतीय परराष्ट्र मंत्रालयाचं नेपाळला रोखठोक उत्तर, लिपुलेखमार्गे मानसरोवर यात्रेला केला होता विरोध

सर्व राज्यांमध्ये पश्चिम बंगालच्या निकालाकडे संपूर्ण देशाचे लक्ष लागले आहे. येथे सत्ताधारी तृणमूल काँग्रेस आणि भाजपमध्ये अतिशय अटीतटीची लढत पाहायला मिळत आहे. बंगालमधील २९४ पैकी २९३ जागांचा निकाल उद्या लागणार असून,

‘फालटा’ या एका जागेसाठी पुन्हा मतदान होणार असल्याने त्याचा निकाल २४ मे रोजी जाहीर केला जाणार आहे. तामिळनाडूमध्येही डीएमके आघाडी आणि टीव्हीके यांच्यात जोरदार संघर्ष होण्याची शक्यता वर्तवण्यात येत आहे.

बारामती, राहुरीसह ८ ठिकाणी काय होणार?

कर्नाटक, नागालँड, गुजरात आणि महाराष्ट्रातील आठ जागांवरील पोटनिवडणुकांचे निकालही सोमवारीच जाहीर होणार आहेत. महाराष्ट्रातील बारामती, राहुरी येथे सुनेत्रा पवार तर राहुरीच्या जागेवर शिवाजी कर्डिले यांचे पुत्र अक्षय कर्डिले निवडणूक रिंगणात आहेत. त्यांचा फैसलाही सोमवारीच लागणार आहे.

सुरक्षेचा कडेकोट बंदोबस्त

मतमोजणीच्या पार्श्वभूमीवर पाचही राज्यांमध्ये व केंद्रशासित प्रदेशात कडेकोट सुरक्षाव्यवस्था तैनात करण्यात आली आहे. मतमोजणी केंद्रांच्या बाहेर निमलष्करी दलाच्या तुकड्या तैनात करण्यात आल्या असून, सीसीटीव्हीच्या देखरेखीखाली ही प्रक्रिया पार पडणार आहे.

पक्षांचे कार्यकर्ते व समर्थकांमध्ये निकालाची उत्सुकता असून, विजयी मिरवणुकांवर निवडणूक आयोगाने काही निर्बंध घातले आहेत.

कोणत्या राज्यात कोणाची सत्ता, एक्झिट पोल काय सांगतात?

राज्य   जागा   बहुमत  सध्या सत्तेत     एग्झिट पोल काय सांगतात?

प. बंगाल       २९४    १४८    तृणमूल भाजप सत्तेत, तृणमूलचीही काही अंशी शक्यता

तामिळनाडू      २३४    ११८    डीएमके+       डीएमकेचे वर्चस्व, टीव्हीके गेमचेंजर ठरणार

केरळ   १४०    ७१     एलडीएफ+      काँग्रेसच्या नेतृत्वातील यूडीएफला सत्तेची संधी

आसाम  १२६    ६४     भाजप+ भाजप आघाडी हॅट्-ट्रिक करत पुन्हा सत्तेत येणार

पुद्दुचेरी ३०     १६     एनडीए  एआयएनआरसीसह भाजप आघाडी सत्ता राखणार