मोदींचा 'झाल मुरी'चा व्हिडीओ, ममता बॅनर्जी म्हणाल्या, "कोणाचा विश्वास बसेल का की, पंतप्रधानांच्या पाकिटामध्ये..."

Mamata Banerjee PM Modi Jhal Muri: पश्चिम बंगालमध्ये प्रचारादरम्यान पंतप्रधान नरेंद्र मोदी यांनी झाल मुरीचा आस्वाद घेतला. मोदींच्या या व्हिडीओवर मुख्यमंत्री ममता बॅनर्जी यांनी पहिल्यांदाच प्रतिक्रिया दिली. 

विधानसभा निवडणुकीच्या निमित्ताने पंतप्रधान नरेंद्र मोदीपश्चिम बंगालमध्ये गेले होते. त्यावेळी त्यांनी झाल मुरीचा आस्वाद घेतला. पंतप्रधान मोदींचा झाल मुरी विकत घेतानाचा व्हिडीओही व्हायरल झाला. मोदींच्या या व्हिडीओवर मुख्यमंत्री ममता बॅनर्जी यांनी टीका केली. त्या म्हणाल्या की, ही एक नौटंकीच होती.

मुख्यमंत्री ममता बॅनर्जी म्हणाल्या की, झाडग्राममध्ये निवडणूक प्रचारादरम्यान नरेंद्र मोदी अचानक झाल मुरी खेरदी करण्यासाठी थांबतात, ही फक्त एक नौटंकी होती. 

हे खरंच विश्वास ठेवण्यासारखं आहे का?

ममता बॅनर्जी या बीरभूम जिल्ह्यातील मुरारई विधानसभा मतदारसंघात प्रचारसभेत बोलत होत्या. "प्रचारावेळी पंतप्रधान मोदी हे कोणत्याही पूर्व नियोजित कार्यक्रमाशिवाय अचानक झाल मुरी खरेदी करण्यासाठी थांबतात. त्यावेळी तिथे कॅमेऱ्यावाले कसे होते?", असा सवाल ममतांनी केला. 

"तिथे कॅमेरे आधीच लावलेले होते. एसपीजीने (सुरक्षा) सगळी सुरक्षा व्यवस्था केलेली होती. पंतप्रधान आपल्या खिशातून जेव्हा १० रुपयांची नोट काढून देतात. खरंच हे विश्वास ठेवण्यासारखं आहे का? ही सगळी फक्त नौटंकी होती.", अशी टीका ममता बॅनर्जी यांनी मोदींवर केली.

ঝাড়গ্রামে ঝালমুড়ি খাবার বিরতি! pic.twitter.com/t0TcDeONxt

— Narendra Modi (@narendramodi) April 19, 2026

लोकांना मटण-मासे खाण्यापासून का रोखले जात आहे? 

ममता बॅनर्जी म्हणाल्या, "तुम्हाला अचानक झाल मुरी आवडायला लागली आहे. पण, भाजपाचे सरकार असलेल्या राज्यांमध्ये लोकांना मांस आणि मासे खाण्यापासून का रोखले जात आहे? प्रत्येकाला आपल्या आवडीचे खाद्य खाण्याचा अधिकार आहे. मला लिट्टी आणि ढोकला आवडतो. मग, मी तुमच्या मांसाहार करण्यावर बंदी घालायला पाहिजे का?", असा ममता बॅनर्जींनी केला.