"तरुण मुलगा गमावण्याचं दुःख मला माहितीये"; 'त्या' २५ कामगारांच्या कुटुंबाला सांत्वन देताना अनिल अग्रवाल झाले भावूक

वेदांत प्लांट अपघातात गुन्हा दाखल झाल्यावर अनिल अग्रवाल यांनी आपली बाजू मांडली आहे.

Anil Agarwal Chhattisgarh Boiler Blast: "काळ कठीण असतो म्हणतात, याचा अनुभव मी गेल्या काही महिन्यांपासून घेत आहे. वर्षाच्या सुरुवातीला मी माझा तरुण मुलगा अग्निवेश याला गमावलं आणि आता १४ एप्रिलला छत्तीसगडच्या प्लांटमध्ये झालेल्या अपघाताने माझे २५ अनमोल सोबती माझ्यापासून हिरावून नेले," अशा शब्दांत वेदांत समूहाचे अध्यक्ष अनिल अग्रवाल यांनी आपल्या भावना व्यक्त केल्या आहेत.

जबाबदारी महारत्न कंपनीकडे होती, तरी घात झाला

छत्तीसगडच्या जांजगीर-चांपा जिल्ह्यातील सिंघीतराई पॉवर प्लांटमध्ये १४ एप्रिल रोजी भीषण स्फोट झाला होता. या अपघातावर स्पष्टीकरण देताना अग्रवाल म्हणाले की, या प्लांटच्या देखभालीची आणि संचालनाची संपूर्ण जबाबदारी देशातील सर्वात विश्वासार्ह मानल्या जाणाऱ्या NTPC-GE च्या भागीदारीतील एनजीएसएल कंपनीला देण्यात आली होती.

अग्रवाल यांनी एक उदाहरण देत म्हटले की, "हे अगदी तसंच आहे, जसं एखादा गाडीचा मालक आपली गाडी एका अनुभवी ड्रायव्हरच्या हाती सोपवतो आणि तो नियमांचे पालन करेल या विश्वासावर निश्चिंत राहतो. आम्हीही तसाच विश्वास टाकला होता, तज्ज्ञ त्यांचे होते, कर्मचारी त्यांचे होते, तरीही हा दुर्दैवी अपघात घडला. होणाऱ्या गोष्टींवर कोणाचीच पकड नसते, पण वेदांत परिवार या संकटकाळात पीडित कुटुंबांच्या पाठीशी खंबीरपणे उभा आहे आणि यापुढेही शक्य ती सर्व मदत करेल."

काय होता नेमका अपघात?

१४ एप्रिल रोजी अथेना पॉवर प्लांटमध्ये बॉयलरमधून टर्बाईनकडे हाय-प्रेशर वाफ नेणाऱ्या पाईपचा भीषण स्फोट झाला होता. या दुर्घटनेत २५ कामगारांचा मृत्यू झाला, तर अनेक जण गंभीर भाजले होते. फॉरेन्सिक रिपोर्टनुसार, इंधनाचा साठा आणि अतिरिक्त दाब निर्माण झाल्यामुळे हा स्फोट झाला होता.

या भीषण दुर्घटनेनंतर वेदांत समूहाने मृतांच्या नातेवाईकांना ३५ लाख रुपयांची मदत आणि कुटुंबातील एकाला नोकरी देण्याचे आश्वासन दिले आहे, तर जखमींना १५ लाख रुपयांची मदत जाहीर केली आहे. मात्र, या प्रकरणात छत्तीसगड पोलिसांनी अनिल अग्रवाल आणि इतरांविरुद्ध एफआयआर दाखल केला आहे. देखभालीत निष्काळजीपणा केल्याचा ठपका ठेवत ही कारवाई करण्यात आली आहे.

उद्योजकांकडून पाठिंबा

दरम्यान, या प्रकरणात उद्योगपती नवीन जिंदाल यांनी अनिल अग्रवाल यांना पाठिंबा दिला आहे. "एखाद्या घटनेची चौकशी पूर्ण झाल्याशिवाय आणि पुराव्यांशिवाय थेट अध्यक्षांवर जबाबदारी ढकलणे योग्य नाही," असे मत त्यांनी व्यक्त केले आहे.