तीन बायका करामत ऐका! साध्या शिपायाने केला असा खेळ, पत्नी, मेहुणी, सासू अन् मैत्रिणींना...  

Uttar Pradesh Crime News: तीन पत्नींचा दादला असलेल्या एका शिपायाने कोट्यवधी रुपयांचा खेळ करून सरकारी पैशांवर डल्ला मारल्याची घटना उत्तर प्रदेशमधील पिलीभीत उघडकीस आली आहे.

तीन पत्नींचा दादला असलेल्या एका शिपायाने कोट्यवधी रुपयांचा खेळ करून सरकारी पैशांवर डल्ला मारल्याची घटना उत्तर प्रदेशमधील पिलीभीत उघडकीस आली आहे. या इसमाने त्याच्या तीन पत्नींसह, मेहुणी, नातेवाईक आणि मैत्रिणींच्या खात्यात कोट्यवधी रुपयांची सरकारी रक्कम वळवली. हे प्रकरण उघडकीस आलं तेव्हा तपासाला सुरुवात झाली. आता या प्रकरणी पोलिसांनी ७ महिलांना अटक केली आहे. त्यात आरोपीच्या दोन पत्नी, मेहुणी, सासू आणि दोन मैत्रिणींचा समावेश आहे. 

याबाबत मिळालेल्या माहितीनुसार आरोपी शिपाई असलेला इल्हम शम्सी ऊर्फ रहमान नावाचा हा इसम डीआयओएस कार्यालयात चतुर्थ श्रेणी कर्मचारी म्हणून कार्यरत होता. याच कार्यालयातून कोट्यवधी रुपयांची अफरातफर झाली होती. आरोपी इल्हम याने महिलांच्या खात्यांमध्ये तब्बल ८ कोटी १५ लाख रुपये पाठवल्याची माहिती पोलिसांनी दिली आहे. या रकमेपैकी ५ कोटी ५० लाख रुपयांची रक्कम गोठवण्यात यश आले आहे.

मात्र २०१८ पासून सुरू असलेल्या या अफरातफरीची कानोकान खबर विभागीय अधिकारी आणि तत्कालीन डीआयओसी यांना कशी काय लागली नाही, हा प्रश्न उपस्थित होत आहे. दरम्यान, १४ फेब्रुवारी रोजी डीआयओसी राजीव कुमार यांनी चतुर्थ श्रेणी कर्मचारी इल्हाम शम्सी आणि त्याची पत्नी आर्शी खातून यांच्याविरोधात तक्रार दिल्यानंतर हे प्रकरण उघडकीस आले होते. या प्रकरणी गुन्हा दाखल करण्यात आल्यानंतर अर्शी खातून हिला अटक करण्यात आली. मात्र मुख्य आरोपी इल्हाम शम्सी हा मात्र बराच काळ जामिनावर बाहेर राहिला.