मुंबई - कोरोना महामारीच्या संकटाचा सामना करतच बिहारमधील विधानसभेच्या निवडणुका पार पडणार आहेत. या निवडणुकांच्या तारखांची घोषणा करण्यात आली असून तीन टप्प्यात ही निवडणूक पार पडणार आहे. मात्र, कोविड रुग्णांना या निवडणुकीत मतदान करता येईल का? त्यांनी कसं मतदान करायचं? यांसह अनेक प्रश्न निर्माण झाले आहेत. त्या पार्श्वभूमीवर निवडणूक आयोगाने कोविड रुग्णांसाठी मतदानाची वेळ निश्चित केली आहे.
कोरोना रुग्णांसाठी मतदानाची स्वतंत्र व्यवस्था असून मतदान केंद्रावर शेटवच्या क्षणी ते मतदानाचा हक्क बजावतील. कोरोनाचं संकट लक्षात घेऊन एका मतदान केंद्रावर एक हजार मतदारांनाच मतदान करता येणार आहे. मुख्य निवडणूक आयुक्त सुनील अरोरा यांनी निवडणुकांच्या तारखांची घोषणा केली असून कोरोना प्रादुर्भावाच्या पार्श्वभूमीवर मास्क, सॅनिटायझर्स आणि गर्दी टाळून ही निवडणूक प्रक्रिया पार पाडण्याचा प्रयत्न असणार आहे. यंदाच्या निवडणुकीसाठी राज्य निवडणूक आयोगाला 6 लाख पीपीई कीट देण्यात येणार असून 46 लाख मास्कचेही वाटप करण्यात येणार आहे. राज्यात 7 लाख सॅनिटायझर्सचा वापर केला जाईल, तसेच 6 लाख फेस शील्डचाही उपयोग करण्यात येईल.
निवडणूक आयोगाने माहिती देताना, 18 लाख प्रवासी मजदूर असून त्यापैकी 16 लाख मजूर मतदानाचा हक्क बजावतील, असे सांगण्यात आले आहे. 80 वर्षे वयाच्या नागरिकांना पोस्टल बॅलेटद्वारे मतदान करता येईल. प्रत्येक पोलिंग बुथवर साबण, सॅनिटायझरसह अन्य सुविधांचा उपयोग करण्यात येणार आहे. तसेच मतदानाची वेळही एक तास वाढविण्यात आली असून सकाळी 7 वाजल्यापासून ते सायंकाळी 5 ऐवजी 6 वाजेपर्यंत मतदान घेण्यात येईल.
बिहारमध्ये 243 जागांसाठी निवडणुका
बिहारमध्ये विधानसभेच्या 243 जागा असून जदयू, भाजपामध्ये जागावाटपाचा फॉर्म्युला ठरविताना रस्सीखेच होण्याची शक्यता आहे. "कोरोनाचे संकट असल्याने जगातील 70 देशांमध्ये निवडणूक पुढे ढकलण्यात आली आहे. बिहारमधील ही निवडणूक कोरोना काळातील सर्वात मोठी निवडणूक आहे. कोरोना काळातील ही पहिलीच विधानसभा निवडणूक असल्याने केंद्रीय निवडणूक आयोगानं यासंदर्भात नियमावली जाहीर केली आहे. सोशल डिस्टन्सिंग पाळण्याच्या दृष्टीनं मतदान केंद्रांची संख्याही वाढवण्यात आली आहे" अशी माहिती सुनील अरोरा यांनी दिली आहे.