प्रभागात ९७ टक्के मुस्लिम मतदार, तरीही अपक्ष हिंदू महिलेने मारली बाजी, मिळवला दणदणीत विजय

Gujarat Local Body Election 2026: गुजरातमधील काही ठिकाणी लागलेल्या आश्चर्यकारक निकालांची आकडेवारी आता समोर येत आहे. यामध्ये गोध्रा येथील एका प्रभागात लागलेल्या निकालाची चर्चा होत आहे. मुस्लिमबहूल आणि तब्बल ९७ मुस्लिम मतदार असलेल्या या प्रभागातून अपक्ष हिंदू महिला विजयी झाली आहे.

गुजरातमधील स्थानिक स्वराज्य संस्थांच्या निवडणुकीच्या काल लागलेल्या निकालांमध्ये भाजपाने दणदणीत विजय मिळवला आहे. राज्यातील १५ पैकी १५ महानगरपालिकांसोबतच बहुतांश नगर परिषदा, जिल्हा परिषदा आणि पंचायत समित्यांमध्ये भाजपाला स्पष्ट बहुमत मिळाले. यादरम्यान, राज्यातील काही ठिकाणी लागलेल्या आश्चर्यकारक निकालांची आकडेवारी आता समोर येत आहे. यामध्ये गोध्रा येथील एका प्रभागात लागलेल्या निकालाची चर्चा होत आहे. मुस्लिमबहूल आणि तब्बल ९७ मुस्लिम मतदार असलेल्या या प्रभागातून अपक्ष हिंदू महिला विजयी झाली आहे.

गोध्रामध्ये भाजपाने मोठा विजय मिळवला आहे. मात्र भाजपाच्या या विजयापेक्षा गोध्रामधील प्रभाग क्रमांक ७ मध्ये लागलेल्या निकालाचीच अधिक चर्चा होत आहे. तसेच या निकालाने राजकीय विश्लेषकांना आश्चर्याचा धक्का बसला आहे. तब्बल ९७ टक्के मुस्लिम मतदार असलेल्या या प्रभागातून अपेक्षाबेन सोनी या अपक्ष महिला उमेदवाराने विजय मिळवला आहे.

कुठल्याही मोठ्या राजकीय पक्षाच्या पाठबळाविना अपक्ष उमेदवार म्हणून निवडणूक लढवताना अपेक्षाबेन सोनी यांनी मोठ्या मताधिक्याने विजय मिळवला आहे. त्यांनी मिळवलेला हा विजय राजकीय यशासोबतच सामाजिक सौहार्द आणि परस्पर विश्वासाचं प्रतीक मानलं जात आहे. एवढंच नाही. तर निकाल लागल्यानंतर मुस्लिम समाजातील लोकांनी अपेक्षा सोनी यांची त्यांच्या वडिलांच्या फोटोसोबत मिरवणूक काढून विजयाचा आनंदही साजरा केला. या निकालामुळे मतदार हे जात धर्म न पाहता विकास आणि वैयक्तिक चांगल्या प्रतिमेच्या उमेदवारांना पाठिंबा देत असल्याचे अधोरेखित झाले आहे.