छत्तीसगड हादरलं! वेदांता पॉवर प्लांटमध्ये भीषण स्फोट; ४० मजूर जखमी

छत्तीसगडच्या शक्ती जिल्ह्यात वेदांता पॉवर प्लांटमध्ये बॉयलर फुटून भीषण अपघात झाला आहे.

छत्तीसगडमधील शक्ती जिल्ह्यातून एक अत्यंत भीषण अपघाताची बातमी समोर येत आहे. सिंघीतराई येथील वेदांता पॉवर प्लांटमध्ये मंगळवारी दुपारी भीषण स्फोट झाला. प्लांटमधील बॉयलर अचानक फुटल्याने झालेल्या या दुर्घटनेत ४० हून अधिक मजूर गंभीर जखमी झाले आहेत. सूत्रांनी दिलेल्या माहितीनुसार, या भीषण अपघातात ४ ते ५ मजुरांचा मृत्यू झाल्याची भीती व्यक्त केली जात आहे, मात्र प्रशासनाने अद्याप याला अधिकृत दुजोरा दिलेला नाही.

स्फोटाने परिसर हादरला, मजुरांची पळापळ

मंगळवारी दुपारी २ च्या सुमारास जेव्हा प्लांटमध्ये काम सुरू होते, तेव्हा अचानक बॉयलरचा मोठा स्फोट झाला. हा स्फोट इतका भीषण होता की, त्याचा आवाज कित्येक किलोमीटरपर्यंत ऐकू आला. स्फोटानंतर प्लांटमध्ये एकच खळबळ उडाली आणि मजुरांनी जीव वाचवण्यासाठी सैरावैरा धाव सुटली. घटनेच्या वेळी अनेक मजूर बॉयलरच्या परिसरात कर्तव्यावर होते, ज्यामुळे जखमींचा आकडा मोठा आहे.

मलब्याखाली अनेकजण अडकल्याची भीती

घटनेची माहिती मिळताच जिल्हा प्रशासनाचे अधिकारी आणि पोलीस ताफा घटनास्थळी रवाना झाला आहे. तातडीने मदत कार्य सुरू करण्यात आले असून रुग्णवाहिकांमार्फत जखमींना जवळच्या रुग्णालयात दाखल करण्यात आले आहे. जखमींपैकी अनेकांची प्रकृती चिंताजनक असल्याने मृतांचा आकडा वाढण्याची शक्यता वर्तवण्यात येत आहे. अद्याप काही मजूर ढिगाऱ्याखाली दबले असण्याची शक्यता असल्याने बचाव पथक युद्धपातळीवर काम करत आहे.

सुरक्षेच्या मुद्द्यावर प्रश्नचिन्ह

हा अपघात तांत्रिक बिघाडामुळे झाला की सुरक्षा मानकांकडे दुर्लक्ष केल्यामुळे, याबाबत सध्या चर्चा सुरू आहे. प्राथमिकदृष्ट्या ही मोठी तांत्रिक चूक असल्याचे बोलले जात आहे. या दुर्घटनेमुळे प्लांटमधील कामगारांच्या सुरक्षेचा प्रश्न पुन्हा एकदा ऐरणीवर आला असून स्थानिक नागरिकांमध्ये संतापाचे वातावरण आहे. जिल्हाधिकारी आणि पोलीस अधीक्षक स्वतः परिस्थितीवर लक्ष ठेवून आहेत.