मनामध्ये जिद्द आणि इच्छाशक्ती असेल तर अशक्य गोष्टी शक्य होतात. दिल्लीच्या मेहरौली भागात राहणाऱ्या १५ वर्षांच्या आरवने हे सत्यात उतरवून दाखवलं आहे. ज्या वयात मुलं खेळण्या-बागडण्यात आणि मित्र-मैत्रिणींमध्ये मग्न असतात, त्या वयात आरव कॅन्सरसारख्या जीवघेण्या आजाराशी दोन हात करत होता. मात्र या संघर्षातही त्याने अभ्यास सोडला नाही. याचाच परिणाम म्हणजे, सीबीएसई (CBSE) १० वीच्या बोर्ड परीक्षेत आरवने ९६.६% गुण मिळवून सर्वांनाच थक्क केलं आहे.
आरवचं हे यश एखाद्या चमत्कारापेक्षा कमी नाही. त्याचे वडील अजय अरोरा, जे स्वतः एक डॉक्टर आहेत, त्यांनी सांगितलं की, २०२२ मध्ये आरवला कॅन्सर असल्याचं निदान झालं होतं. त्यानंतर त्याच्या पाठीच्या कण्यावर मोठी सर्जरी करण्यात आली. सुमारे एक वर्ष आरव घर आणि रुग्णालय हेच करत होता. पण त्याने हार मानली नाही. रुग्णालयात उपचार सुरू असतानाही तो मोबाईलच्या माध्यमातून ऑनलाईन क्लासला उपस्थित राहायचा.
आरवच्या वडिलांच्या म्हणण्यानुसार, कुटुंबाच्या अपेक्षा खूप कमी होत्या. ते म्हणतात, "आरवने फक्त कसंबसं पास व्हावं, इतकीच आमची इच्छा होती. आजारपण आणि उपचारांच्या प्रचंड ओझ्याखाली अभ्यास करणं खूप कठीण होतं. पण जेव्हा निकाल लागला, तेव्हा आम्हा सर्वांची बोलतीच बंद झाली. आरवने आपल्या कष्टाने आम्हा सर्वांना निशब्द केलं आहे."
आरव हा केवळ एक विद्यार्थी नाही, तर एक जिज्ञासू योद्धा आहे. उपचारादरम्यान तो स्वतःच्या आजाराबद्दल माहिती वाचायचा आणि डॉक्टरांना प्रश्न विचारायचा. त्याच्या या सकारात्मक विचारसरणीनेच त्याला या कठीण काळातून बाहेर पडण्यास मदत केली. मित्र आणि समुपदेशकांनीही या संघर्षाच्या काळात त्याला पूर्ण पाठिंबा दिला.
आरवला गणिताची प्रचंड आवड आहे. भविष्यात त्याला 'अॅस्ट्रोफिजिक्स'मध्ये (खगोलशास्त्र) शिक्षण घ्यायचं असून, 'इस्रो' (ISRO) किंवा 'नासा' (NASA) सारख्या मोठ्या अंतराळ संस्थांमध्ये संशोधक म्हणून काम करण्याचं त्याचं स्वप्न आहे. फावल्या वेळेत आरवला थोर पुरुषांची प्रेरणादायी पुस्तकं वाचायला आवडतात.