अपघातात दोन युवकांचा मृत्यू

भरधाव वाहनाने दुचाकीला जोराची धडक दिल्याने झालेल्या अपघातात दोघांचा मृत्यू झाला

लोकमत न्यूज नेटवर्क
तीर्थपुरी : भरधाव वाहनाने दुचाकीला जोराची धडक दिल्याने झालेल्या अपघातात दोघांचा मृत्यू झाला. ही घटना सोमवारी रात्री बीड- नगर महामार्गावरील नवगण राजुरी जवळ घडली.
नंदू भीमराव खोजे (१९), रोहन भरत बळते (१८ दोघे रा. जोगलादेवी ता. घनसावंगी) अशी मयतांची नावे आहेत. घनसावंगी तालुक्यातील जोगलादेवी येथील भरत बळते हे नगर जिल्ह्यातील जामखेड येथे कामाला आहेत. त्यांना भेटण्यासाठी त्यांचा मुलगा रोहन बळते व नंदू खोजे हे दोघे सोमवारी सायंकाळी दुचाकीवरून जामखेडकडे जात होते. त्यांची दुचाकी बीड- नगर महामार्गावरील नवगण राजुरी जवळ आली असता अज्ञात वाहनाने जोराची धडक दिली. या अपघातात नंदू खोजे हा जागीच ठार झाला.
रोहन बळते यास बीड येथील शासकीय रुग्णालयात उपचारासाठी दाखल करण्यात आले होते. प्रथमोपचारानंतर त्याला औरंगाबादला नेत असताना गेवराई जवळ त्याचा मृत्यू झाला. तीर्थपुरी येथील प्राथमिक आरोग्य केंद्रात त्याच्या पार्थिवाचे शवविच्छेदन करण्यात आले. जोगलादेवी येथे मंगळवारी दुपारी नंदू खोजे व रोहन बळते यांच्यावर शोकाकुल वातावरणात अंत्यसंस्कार करण्यात आले.
दरम्यान, पित्याला भेटण्यासाठी जाणाऱ्या मुलासह दोघांवर काळाने घाला घातल्याने गावात हळहळ व्यक्त केली जात आहे.