जागतिक महिला दिनानिमित्त राष्ट्रवादी काँग्रेस पक्षाचे जिल्हाध्यक्ष डाॅ.अभिजीत मोरे यांच्या सूचनेने व राष्ट्रवादी काँग्रेस ओबीसी सेल यांच्या माध्यमातून नारी सन्मान कार्यक्रम राबविण्यात आला. नंदुरबार शहरातील विविध शासकीय कार्यालयातील विविध पदांवर कार्यरत महिला अधिकारी, कर्मचारी यांना सन्मान चिन्ह व प्रमाणपत्र देऊन गौरविण्यात आले. याप्रसंगी ओबीसी सेल प्रदेश सरचिटणीस कमलेश चौधरी, ओबीसी सेल जिल्हाध्यक्ष चंद्रकांत पाटील, नंदुरबार शहराध्यक्ष नितीन जगताप, ॲड.अश्विनी जोशी, शहर उपाध्यक्ष पंकज पाटील, राजा ठाकरे, ओबीसी सेल नंदुरबार शहराध्यक्ष सचिन सोनार, कुशल मोरे आदी पदाधिकारी, कार्यकर्ते उपस्थित होते.
जिजामाता महाविद्यालय, नंदुरबार
नंदुरबार शहरातील जिजामाता शिक्षण संस्थेच्या कला, विज्ञान व वाणिज्य महाविद्यालयात राष्ट्रीय सेवा योजना व विद्यार्थी विकास विभाग यांच्या संयुक्त विद्यमाने आंतरराष्ट्रीय महिला दिन साजरा करण्यात आला. यावेळी भैरवी चित्ते, मेघना बैसाणे या विद्यार्थिनींनी मनोगत व्यक्त केले. याप्रसंगी प्रा.संजय महाले यांनी महिला दिनाचे महत्त्व पटवून दिले. कार्यक्रमाच्या अध्यक्षस्थानी प्राचार्य डॉ.टी.ए. मोरे, प्रा.के.जी. सोनार होते. कार्यक्रमासाठी विद्यार्थी विकास अधिकारी प्रा.डी.व्ही. सोनवणे यांनी परिश्रम घेतले. आभार राष्ट्रीय सेवा योजनेचे कार्यक्रम अधिकारी प्रा.डॉ.अनंता देशमुख यांनी मानले. कार्यक्रमास प्राध्यापक, कर्मचारी व विद्यार्थिनींसह विद्यार्थी उपस्थित होते.
नवापुरात स्वच्छतेचा जागर
नवापूर तालुक्यातील खेकडा, मोग्राणी, डोगेगाव, खडकीपाडा, थुवा या गावांमध्ये महिला दिनानिमित्त एन.एस.ई फाउंडेशन, सी.वाय.डी.ए. संस्था, फिनिश सोसायटी व स्वच्छ भारत मिशन यांच्या संयुक्त विद्यमाने महिला दिन साजरा करण्यात आला. प्रारंभी मान्यवरांच्या हस्ते प्रतिमा पूजन करण्यात आले. यावेळी महिला शक्ती, वैयक्तिक स्वच्छता, हागणदरीमुक्त गाव याविषयी विविध खेळ व साधनांचा वापर करून मार्गदर्शन करण्यात आले. या वेळी खेकडा गावातील महिलांनी प्रत्येक महिन्यातील ५ तारखेला गावात स्वच्छता मोहीम राबविण्याचा निर्धार केला. वाय.डी.ए. संस्थेचे कर्मचारी, अंगणवाडीसेविका, आशा वर्कर व गावातील युवती-महिला उपस्थित होत्या.