नंदुरबार : जिल्ह्यात दोन वेगवेगळ्या घटनेत दोन विवाहितांचा छळ झाल्याची घटना घडली. याप्रकरणी शहादा व नंदुरबार शहर पोलीस ठाण्यात गुन्हा दाखल करण्यात आला आहे.
पहिली घटना मंदाणे येथील माहेर असलेल्या विवाहितेबाबत घडली. प्रियंका बाळकृष्ण बागुल या महिलेचा बाळकृष्ण दगा बागुल, रा.बडोदा यांच्याशी विवाह झाला होता. विवाह झाल्यापासून अर्थात दोन वर्षांपासून प्रियंका यांचा छळ केला जात होता. आपल्या आर्थिक व सामाजिक पातळीचे कुटुंब नाही, अशा कुटुंबातील मुलगी केल्याने आम्हाला शोभत नाही म्हणून छळ केला जात होता. बडोदा येथे सासरी व मंदाणे येथे माहेरीदेखील छळ सुरूच होता. त्या छळाला कंटाळून प्रियंका यांनी फिर्याद दिली. त्यांच्या फिर्यादीवरून बाळकृष्ण बागुुल, सखुबाई दगा बागुल, नीता विजय सोनवणे, विजय सुभाष सोनवणे, किरण दगा बागुल सर्व रा.बडोदा यांच्याविरुद्ध शहादा पोलीस ठाण्यात गुन्हा दाखल करण्यात आला आहे. तपास हवालदार काळूराम चौरे करीत आहे.
दुसरी घटना नंदुरबारातील परदेशीपुरा भागात घडली. नीलम संदीपकुमार मिश्रा या महिलेचा अहमदाबाद येथील संदीपकुमार जयप्रकाश मिश्रा यांच्याशी विवाह झाला होता. विवाहितेच्या चारित्र्यावर संशय घेऊन तसेच डॉक्टरांनी कानाचे ऑपरेशन सांगितल्याचा राग येऊन नीलम यांचा छळ करण्यात येत होता. त्या छळाला कंटाळून त्यांनी शहर पोलीस ठाण्यात फिर्याद दिली. त्यांच्या फिर्यादीवरून संदीपकुमार जयप्रकाश मिश्रा, जयप्रकाश मिश्रा, मनिलाल मिश्रा, सरोजिनी जयप्रकाश मिश्रा, खुशबू जयप्रकाश मिश्रा, शांतीलाल मिलाल मिश्रा, विजयप्रकाश मणिलाल मिश्रा, वेदप्रकाश मणिलाल मिश्रा, शिवप्रकाश मणिलाल मिश्रा सर्व रा. अहमदाबाद व ग्रिष्मा अशोक दुबे, अशोक रघुनाथ दुबे, ममता संजय पांडे, रा. उत्तर प्रदेश यांच्याविरुद्ध गुन्हा दाखल करण्यात आला आहे. तपास हवालदार ठाकरे करीत आहे.