नरेश डोंगरे
लोकमत न्यूज नेटवर्क
नागपूर : रेल्वे गाड्यांमधून तस्करीचा पर्दाफाश होण्याची भीती वाढल्याने अंमली पदार्थांसह वेगवेगळ्या प्रकारची तस्करी करणारांनी आता 'जर्नी ब्रेक'चा फंडा अवलंबिला आहे.
रेल्वे गाड्यांमधून गांजा, एमडी, दारूसह गोल्डचीही तस्करी केली जाते. परप्रांतिय मजूर, बालमजूरांचीही तस्करी होते. हवालाची रोकडही ईकडून तिकडे पाठविली जाते. मात्र, अलिकडे रेल्वे सुरक्षा दल (आरपीएफ) आणि रेल्वे पोलिसांसह अन्य तपास यंत्रणा अलर्ट मोडवर आल्यामुळे तस्करीच्या नेटवर्कमध्ये गुंतलेल्या जवळपास सर्वांनीच आता त्यांना गुंगारा देण्यासाठी नवीन शक्कल शोधल्याची संबंधित सूत्रांची माहिती आहे.
रेल्वेगाड्यांमधून सर्वाधिक गांजा तस्करी ओडिशातून केली जाते. आधी मलकनगिरी आणि आता संभलपूरमधून गांजाची खेप घेऊन तस्कर आणि त्यांचे पंटर कोलकाता येथून रेल्वेने निघतात. नागपूर विभागात पकडले जाण्याचा धोका वाढल्याने ते राजनांदगाव, गोंदिया किंवा मधल्या छोट्या रेल्वे स्थानकावर उतरतात. तेथून ते बस किंवा ट्रॅव्हल्समध्ये बसून नागपूरकडे येतात आणि येथून नियोजित ठिकाणी खेप पोहचतात.
मध्यप्रदेश आणि छत्तीसगडमध्ये मोठ्या प्रमाणात नकली दारू बनविली जाते. ब्रॅण्डेड कंपन्यांचे लेबल आणि तशाच बाटल्या वापरून ही दारू रेल्वेने पांढूरणा, बैतूल, गोंदियासह वेगवेगळ्या स्थानकावरून नागपूरमध्ये आतापर्यंत यायची. मात्र, अलिकडे नागपूर आधीच्या रेल्वे स्थानकावर उतरून तेथून ही मंडळी नकली दारूंची खेप नागपूर शहरासह आजुबाजुच्या ठिकाणी पोहचवितात.
गोल्ड स्मगलिंग
रायपूर, दिल्ली, अमृतसर आणि जळगाव येथून तस्करीच्या सोन्याची खेप ईकडे तिकडे होत असल्याचे सांगितले जाते. ही मंडळी देखिल नागपूरला धोका होतो, हे लक्षात आल्यामुळे आजुबाजुच्या जिल्ह्यापर्यंतच सोन्याची खेप आणते आणि नंतर टॅक्सी किंवा बस-ट्रॅव्हल्समधून नियोजित ठिकाणी तस्करीचे सोने पोहचवते
हवालाची रक्कम सर्वाधिकमध्ये भारतात नागपूरहून सर्वात जास्त हेरफेर हवालाच्या रकमेची होते. आधी मिठाईच्या बॉक्समधून रक्कम पाठवली जायची. नंतर हवालाच्या रकमेची हेरफेर करण्यासाठी थेट पार्सलचाच वापर सूरू झाला. कापड किंवा अन्य दुसऱ्या कोणत्या चिजवस्तू असल्याचे भासवून रेल्वेच्या पार्सल रुममध्ये ते पार्सल सोडायचे आणि नंतर पाहिजे त्या ठिकाणी ते उतरवून घ्यायचे, असा हवालावाल्यांचा फंडा होता. मात्र, अशा प्रकारे नागपुरातून पाठविण्यात आलेली रक्कम मुंबईच्या पार्सल रुममध्ये पकडली गेल्यामुळे त्यांनीही आता उपरोक्त 'जर्नी ब्रेकचा फंडा' वापरणे सुरू केले आहे.