लोकमत न्यूज नेटवर्क
नागपूर : नागपूर शहराची लोकसंख्या २८ लाखांच्या आसपास आहे. यात ४५ वर्षावरील नागरिकांची संख्या ७ लाखांच्या आसपास आहे. यातील जवळपास ३ लाख ९० हजार लोकांना लसीचा पहिला डोज दिला आहे तर दुसरा डोस ४४ हजार ४७१ लोकांनी घेतला आहे. १ मे पासून १८ वर्षापुढील सर्वांना लस दिली जाणार आहे. नागपूर शहरात अशा लोकांची संख्या १९ लाखांहून अधिक आहे. या आधीचे टार्गेट ६० टक्केहून अधिक पूर्ण झाले आहे. त्यात लसीचा पुरेसा साठा वेळेवर उपलब्ध होत नसल्याने लसीकरणावर परिणाम झाला आहे. सध्या २० हजार डोस उपलब्ध आहे. १८ वर्षावरील सर्वांना लस द्यावयाची झाल्यास केंद्र सरकारकडून लसीचा पुरवठा वाढवावा लागेल. सोबतच मनपाला लसीकरण केंद्राची संख्या वाढवावी लागणार आहे.
....
तर दररोज द्यावे लागतील २७ हजार डोस
१८ वर्षावरील सर्वाना लस दिली जाणार आहे. नागपूर शहरात या वयोगटातील लोकांची संख्या १९ लाख ७८७ इतकी आहे. यातील ३ लाख ९० हजार लोकांना लस दिली आहे. उर्वरित १६ लाख १०हजार लोकांना लस देण्याचे टार्गेट सहा महिन्यात पूर्ण करावाचे झाल्यास दररोज २७ हजार लोकांना लस द्यावी लागेल.
...
शहराची लोकसंख्या - २८ लाख
१८ ते ४५ वयोगटातील लोकसंख्या -१९ लाख ७८७
स्त्री-९२०७१२
पुरुष-९७९९९५
...
तीन दिवसाचा साठा
शहरातील १२२ केंद्रावर लसीकरणाची व्यवस्था करण्यात आली आहे. केंद्रांची क्षमता दररोज २० हजाराहून अधिक आहे. परंतु लसीचा पुरेसा साठा नसल्याने मागील काही दिवसात लसीकरण कमी होत आहे. मागील काही दिवसापूर्वी १६ हजारांवर गेलेला लसीकरणाचा आकडा या आठवड्यात ७ हजारांवर आला आहे. त्यानुसार तीन दिवस पुरेल इतकाच लस साठा उपलब्ध आहे.
...
४५ पेक्षा जास्त वयाचे ६० टक्केहून अधिक लसीकरण
शहरातील लोकसंख्या २८ लाखांच्या आसपास आहे. यात ४५ वर्षाहून अधिक वय असलेल्यांची संख्या ७ लाख आहे. यातील ३ लाख ९० हजार लोकांना लसीचा पहिला डोज दिला आहे. याचा विचार करता जवळपास ६० टक्के लसीकरण झाले आहे. लसीकरणाचा पुरेसा साठा नाही. सोबतच नागरिकांचाही अपेक्षित प्रतिसाद दिसत नाही.
...
१.५१ लाख ज्येष्ठांचे लसीकरण
नागपूर शहरात ६० वर्षावरील नागरिकांची संख्या अडीच लाखांहून अधिक आहे. परंतु आजवर १ लाख ५१ हजार ज्येष्ठांनी लसीकरण केले आहे. लसीकरणाला ज्येष्ठांचाही अपेक्षित प्रतिसाद नसल्याचे चित्र आहे.
....
४४४७१ जणांनी घेतला दुसरा डोस
पहिला डोस घेतल्यानंतर चार ते सहा आठवड्यांनी दुसरा डोस दिला जातो. आजपर्यंत४४ हजार ४७१ लोकांनी दुसरा डोस घेतला आहे. पुढील काही दिवसात ही संख्या वाढणार आहे.
...
लसीकरण केंद्रात वाढ करावी लागेल
नागपूर शहरात सध्या १२२ लसीकरण केंद्र सुरू आहे. दररोज २४ ते २५ हजार डोस देण्याची क्षमता आहे. १८ वर्षावरील सर्वांना लस देण्यासाठी लस पुरवठ्यासोबतच
गरज भासल्यास शहरातील लसीकरण केंद्रांची संख्या वाढवावी लागणार आहे.