नागपुरात रुग्णांच्या जिवाशी खेळ, बनावट इंजेक्शन्सच्या विक्रीचे रॅकेट; तुलसीनगरातून साठा जप्त, दिल्ली-मुंबईपर्यंत ‘लिंक’

नागपूरमध्ये नागरिकांच्या जिवाशी थेट खेळ करणारे बनावट इंजेक्शन्सचे मोठे रॅकेट उघडकीस आले आहे.

नागपूर : नागपूरमध्ये नागरिकांच्या जिवाशी थेट खेळ करणारे बनावट इंजेक्शन्सचे मोठे रॅकेट उघडकीस आले आहे. नफ्याच्या हव्यासापोटी आरोपींनी लोकांच्या आरोग्याशी व जिवाशी खेळण्याचा प्रकार सुरू होता. पोलिसांनी तुलसीनगरातून इंजेक्शन्सचा साठा जप्त केला आहे. शांतीनगर पोलिस ठाण्याच्या हद्दीत ही घटना घडली.

अन्न व औषध प्रशासन विभागातर्फे विविध औषध कंपन्या व डिस्ट्रीब्युटर्सकडील औषधे व इंजेक्शन्सची तपासणी करण्यात येते. याअंतर्गत मेसर्स हिताशी फार्मास्युटिकल्सची (तुलसी अपार्टमेंट्स, तुलसीनगर कॉलनी) येथे तपासणी केली असता तेथील ॲलब्युरेल या इंजेक्शनचे सॅम्पल्स तपासणीसाठी पाठविण्यात आली. ही तपासणी ऑक्टोबर २०२५ मध्ये झाली होती. याचा अहवाल आल्यावर विभागातील अधिकाऱ्यांना मोठा धक्काच बसला. ती इंजेक्शन बनावट असल्याची बाब अहवालातून समोर आली होती. ही औषधे थेट विक्रीसाठी ठेवण्यात आली होती, म्हणजेच नागरिकांना बनावट इंजेक्शन्सचा पुरवठा सुरू होता. 

या प्रकरणात अन्न व औषध विभागामार्फत सखोल चौकशी करण्यात आली. तेव्हा मुंबई, नवी मुंबई, हैदराबाद, दिल्ली, चंदीगड या शहरांपर्यंत रॅकेटचे धागेदोरे पोहोचल्याचे स्पष्ट झाले. अन्न व औषध विभागातील औषध निरीक्षक प्रशांत राजेंद्र रामटेके यांच्या तक्रारीवरून पोलिसांनी मेसर्स हिताशी फार्मास्युटिकल्स, मेसर्स एन. आर. एन. मित्र डिस्ट्रीब्युटर्स-मुंबई, मेसर्स एन. आर. मित्र डिस्ट्रीब्युटर्स- हैदराबाद, मेसर्स आर.आर.टी. फार्मा-पनवेल-नवी मुंबई, दिल्लीतील दानिश खान व राजकुमार मिश्रा यांच्याविरोधात गुन्हा दाखल केला आहे.

हजारो इंजेक्शन्सची विक्री

तपासात असे उघड झाले की, सप्टेंबर ते डिसेंबर २०२५ या काळात मोठ्या प्रमाणावर बनावट इंजेक्शन्सचा साठा तयार करून तो बाजारात विकण्यात आला. या बनावट इंजेक्शन्समुळे ती जणांचे आरोग्य बिघडले असेल, किती जणांचे उपचार अयशस्वी ठरले असतील, हा एक मोठा सवाल आहे.