भाजपच्या काळात बरखास्तीचा निर्णय, पण प्रक्रिया अपूर्ण
लोकमत न्यूज नेटवर्क
नागपूर : तत्कालीन भाजप सरकारने नागपूर सुधार प्रन्यास अधिनियम बरखास्त करण्याचा निर्णय घेतला. परंतु प्रक्रिया मात्र पूर्ण केली नाही. यातच राज्यात महाविकास आघाडीचे सरकार आले. तेव्हापासूनच नासुप्र बरखाास्तीचा निर्णय रद्द होणार असे सांगितले जात होते. अखेर ते खरे ठरले. गुरुवारी मुख्यमंत्री उद्धव ठाकरे यांच्या अध्यक्षतेखाली पार पडलेल्या मंत्रिमंडळाच्या बैठकीत नासुप्र बरखास्तीचा निर्णय रद्द करण्यास मंजुरी प्रदान करण्यात आली.
नागपूर सुधार प्रन्यास ही स्वायत्त संस्था बरखास्त करण्यासंदर्भात २७ डिसेंबर २०१६ आणि १३ ऑगस्ट २०१९ रोजी मंत्रिमंडळाने निर्णय घेतले होते. सध्याच्या परिस्थितीत याची अंमलबजावणी करण्याची आवश्यकता नसल्याने हे निर्णय मागे घेण्यास येत असल्याचे सांगण्यात आले आहे.
शहरात एकच विकास प्राधिकरण असावे, या हेतूने महापालिकेतील पदाधिकाऱ्यांनी नागपूर सुधार प्रन्यास रद्द करून शहरातील नासुप्रच्या मालमत्ता व योजना मनपाकडे हस्तांतरित करण्याची मागणी केली होती. मागच्या भाजप सरकारने व त्यावेळी नागपूरचे मुख्यमंत्री असल्याने विधानसभेत नासुप्र बरखास्तीची घोषणा केली होती. मात्र भाजप सरकारच्या काळात नासुप्र बरखास्तीची प्रक्रिया पूर्ण झाली नाही. त्यानंतर राज्यातील सत्ता परिवर्तनासोबतच नासुप्रला पुनरुज्जीवित करण्याची प्रक्रिया सुरू झाली होती. राज्य सरकारने आ. विकास ठाकरे यांची नासुप्रच्या विश्वस्तपदी नियुक्ती करून नासुप्र पुनरुज्जीवित होणार असल्याचे संकेत दिले होते.
तसेच युती सरकारच्या निर्णयानंतर नासुप्रकडील गुंठेवारी व उद्यान हे दोन विभाग मनपाकडे हस्तांतरित करण्यात आले. नासुप्रच्या मालकीच्या शहरातील मालमत्ता व लीजवरील भूखंड अजूनही त्यांच्याकडे कायम होते. बरखास्तीची प्रक्रिया पूर्ण न झाल्याने अजूनही नासुप्रचा कारभार सुरू होताच.
बॉक्स
शासनाचे आभार, विकास कामांना गती मिळणार
नासुप्र बरखास्तीचा निर्णय घेतल्यापासून नागपुरातील १९०० व ५७२ ले आऊटमधील विकास कामे रखडली होती. लोकांना आरएल लेटर मिळत नव्हते. कुठलेही काम होत नव्हते. लोकांच्या वाढत्या तक्रारी लक्षात घेऊन नासुप्र बरखास्तीचा निर्णय रद्द करावा म्हणून मी मागणी लावून धरली. विधानसभेतही हा प्रश्न लावून धरला. सातत्याने पाठपुरावा केला. माझ्या प्रयत्नांना अखेर यश आले.शासनाने नासुप्र बरखास्ती रद्द केली. याबाबत मुख्यमंत्री उद्धव ठाकरे यांच्यासह शासनाचे आभार. आता रखडलेली विकास कामे मार्गी लागतील.
आ. विकास ठाकरे, विश्वस्त, नासुप्र