नागपूर: विदर्भ, कोकण आणि गोवा या क्षेत्रांना थेट रेल्वे नेटवर्कने जोडण्याच्या दृष्टीने आजचा दिवस ऐतिहासिक ठरला आहे. नागपूर आणि मध्य भारताच्या रेल्वे कनेक्टिव्हिटीला मोठी गती देत, सेंट्रल रेल्वेच्या नागपूर विभागाने गाडी क्रमांक ११२०३/११२०४ नागपूर-मडगाव एक्स्प्रेस ही नियमित रेल्वे सेवा सुरू करून एक नवा मैलाचा दगड गाठला आहे. याआधी विशेष ट्रेन (TOD Special) म्हणून चालवल्या जाणाऱ्या या गाडीला रेल्वे बोर्डाने आता कायमस्वरूपी नियमित केले असून, केंद्रीय रस्ते वाहतूक आणि महामार्ग मंत्री नितीन गडकरी यांच्या हस्ते आज या गाडीचा अधिकृत शुभारंभ करण्यात आला.
नागपूर रेल्वे स्थानकावर दिमाखदार सोहळा
नागपूर रेल्वे स्थानकाच्या प्लॅटफॉर्म क्रमांक ८ वर आज दुपारी ठीक २:३० वाजता हा उद्घाटन सोहळा पार पडला. केंद्रीय मंत्री नितीन गडकरी यांनी हिरवी झेंडी दाखवून या गाडीला मार्गस्थ केले. याप्रसंगी रामटेकचे खासदार श्यामकुमार बर्वे, आमदार विकास ठाकरे, आमदार प्रवीण दटके, परिणय फुके, कृपाल तुमाने, सुधाकर अडबाले, आणि नागपूरच्या महापौर नीता ठाकरे यांच्यासह रेल्वेचे वरिष्ठ अधिकारी, लोकप्रतिनिधी आणि मोठ्या संख्येने प्रवासी उपस्थित होते.
असे असेल रेल्वेचे वेळापत्रक आणि मार्ग
ही गाडी आठवड्यातून दोन दिवस (Bi-weekly) धावणार असून याचे नियमित संचालन खालीलप्रमाणे असेल:
- गाडी क्र. ११२०३ (नागपूर ते मडगाव): ही ट्रेन १६ मे २०२६ पासून नियमित धावेल. नागपूरवरून दर बुधवार आणि शनिवारी दुपारी १५:०५ वाजता सुटेल आणि दुसऱ्या दिवशी संध्याकाळी १७:४५ वाजता गोव्यातील मडगाव स्थानकावर पोहोचेल.
- गाडी क्र. ११२०४ (मडगाव ते नागपूर): ही ट्रेन १७ मे २०२६ पासून परतीचा प्रवास सुरू करेल. मडगाववरून दर गुरुवार आणि रविवारी रात्री २०:०० वाजता सुटेल आणि दुसऱ्या दिवशी रात्री २१:२५ वाजता नागपूरला पोहोचेल.
- प्रमुख थांबे: प्रवाशांच्या सोयीसाठी ही गाडी वर्धा, पुलगाव, धामणगाव, बडनेरा, अकोला, शेगाव, मलकापूर, भुसावळ, नाशिक रोड, इगतपुरी, कल्याण, पनवेल, रोहा, माणगाव, खेड, चिपळूण, संगमेश्वर रोड, रत्नागिरी, राजापूर रोड, कणकवली, कुडाळ, सावंतवाडी रोड, थिविम आणि करमळी या महत्त्वाच्या स्थानकांवर थांबेल.
पर्यटन आणि व्यापाराला मिळणार नवी भरारी
या थेट रेल्वे सेवेचे नियमितीकरण हा विदर्भ आणि गोव्यादरम्यानच्या दळणवळणाचा स्तर उंचावणारा एक मोठा निर्णय ठरला आहे. यामुळे पर्यटनाला आणि प्रादेशिक व्यापाराला मोठी चालना मिळणार असून, विदर्भातील जनतेचे थेट गोव्याला जाण्याचे अनेक वर्षांचे स्वप्न पूर्ण झाले आहे. प्रवाशांना अधिक आरामदायी आणि सुटसुटीत प्रवासाचा पर्याय उपलब्ध करून देण्यासाठी मध्य रेल्वे कटिबद्ध असल्याचे यावेळी रेल्वे प्रशासनातर्फे सांगण्यात आले.
Web Summary : The Nagpur-Madgaon Express is now a regular service, enhancing connectivity between Vidarbha, Konkan, and Goa. Nitin Gadkari flagged off the train, which will run bi-weekly, boosting tourism and trade. The train will stop at key stations, offering a convenient travel option.
Web Summary : नागपुर-मडगांव एक्सप्रेस अब नियमित सेवा है, जिससे विदर्भ, कोंकण और गोवा के बीच कनेक्टिविटी बढ़ गई है। नितिन गडकरी ने ट्रेन को हरी झंडी दिखाई, जो सप्ताह में दो बार चलेगी, जिससे पर्यटन और व्यापार को बढ़ावा मिलेगा। यह ट्रेन प्रमुख स्टेशनों पर रुकेगी, जिससे यात्रा का सुविधाजनक विकल्प मिलेगा।