दोन दिवसात ७५ लाखांचे नुकसान

कर्मचाऱ्यांना अतिशय तोकडे वेतन असल्यामुळे महाराष्ट्र एसटी वर्कर्स काँग्रेस(इंटक)च्या वतीने पुकारण्यात आलेल्या बंदमुळे गुरुवार आणि शुक्रवारी दुपारी १२.३० वाजेपर्यंत ...

नागपूर : कर्मचाऱ्यांना अतिशय तोकडे वेतन असल्यामुळे महाराष्ट्र एसटी वर्कर्स काँग्रेस(इंटक)च्या वतीने पुकारण्यात आलेल्या बंदमुळे गुरुवार आणि शुक्रवारी दुपारी १२.३० वाजेपर्यंत एसटी महामंडळाच्या नागपूर विभागातील ५५० बसेसपैकी एकही बस आगाराबाहेर पडली नाही. दोन दिवस सुरू असलेल्या या संपामुळे महामंडळाच्या नागपूर विभागाला तब्बल ७५ लाखांचा फटका बसला. शुक्रवारी दुपारी १२.३० नंतर सर्व बसेस आपल्या नियोजित वेळेनुसार धावल्या. महाराष्ट्र एसटी वर्कर्स काँग्रेस(इंटक)च्या वतीने २०१२-२०१६ चा कामगार करार रद्द करून २५ टक्के वेतनवाढ करण्याची मागणी केली होती. १७ डिसेंबरला संप पुकारण्याचा इशारा संघटनेचे अध्यक्ष माजी आमदार जयप्रकाश छाजेड यांनी महिनाभरापूर्वी दिला होता. परंतु महामंडळाच्यावतीने त्यावर काहीच निर्णय न घेतल्यामुळे संघटनेने संपूर्ण महाराष्ट्रात एसटी बसेस आगाराबाहेर पडू दिल्या नाहीत. एसटी महामंडळाच्या नागपूर विभागात एकूण आठ आगार आहेत. या आठ आगारात एकूण ५५० बसेस आहेत. संपामुळे या बसेसपैकी एकही बस आगाराबाहेर पडली नाही. त्यामुळे नागपूर विभागाला तब्बल ७५ लाखांचा फटका बसला आहे. महामंडळाच्या नागपूर विभागात एकूण ११२५ चालक, ११६४ वाहक, ५८९ मेकॅनिकल आणि २८० कार्यालयीन कर्मचारी आहेत. संपामुळे हे सर्व कर्मचारी दिवसभर महामंडळाच्या आगारात रिकामे बसून होते. दरम्यान परिवहन मंत्री दिवाकर रावते यांनी संघटनेस २०१६-२०२० च्या करारात कर्मचाऱ्यांच्या वेतनाचा प्रश्न निकाली लावण्याचे आश्वासन दिल्यामुळे हा संप मागे घेण्यात आला. दुपारी १२.३० वाजेनंतर नागपूर विभागातील सर्व बसेस आपल्या वेळापत्रकानुसार धावण्यास सुरुवात झाली. (प्रतिनिधी)