फेसबूकवरील बाळासाहेबांच्या आक्षेपार्ह छायाचित्रांमुऴे तणाव

फेसबूक या सोशल नेटवर्किगसाईटवर शिवसेनाप्रमुख बाळासाहेब ठाकरे यांचे आक्षेपार्ह फोटो टाकल्याने यवतमाळ येथे तणावाचे वातावरण निर्माण झाले होते. सध्या या शहरातील तणाव निवळला आहे.

ऑनलाइन टीम

सातारा/यवतमाळ, दि. १ - फेसबूक या सोशल नेटवर्किगसाईटवर शिवसेनाप्रमुख बाळासाहेब ठाकरे यांचे आक्षेपार्ह फोटो टाकल्याने यवतमाळ व सातारा येथे तणावाचे वातावरण निर्माण झाले होते. संतप्त कार्यकर्त्यांनी रस्त्यावर उतरुन एसटी गाड्यांची तोडफोड केली. सध्या या दोन्ही शहरातील परिस्थिती नियंत्रणात आहे.

काही अज्ञात समाजकंटकांनी शिवसेना प्रमुख बाळासाहेब ठाकरे तसेच अन्य काही मान्यवर व्यक्तींच्या फोटोची विटंबना करुन ते छायाचित्र फेसबूकवर अपलोड केली होती. हे छायाचित्र वेगाने पसरु लागल्याने शिवसेना व शिवप्रेमींमध्ये संतापाचे वातावरण निर्माण झाले. सातारा येथे शनिवारी रात्री उशीरा शिवप्रेमींनी रस्त्यावर उतरुन विरोधप्रदर्शन केले. संतप्त शिवप्रेमींनी एसटी गाड्यांची तोडफोड केली. तर यवतमाळमध्ये संतप्त शिवसैनिकांनी चार एसटी गाड्यांची तोडफोड केली. सध्या या दोन्ही शहरातील तणाव निवळला आहे.

दरम्यान, या घटनेनंतर पोलिसांनी नागरिकांनी अफवांवर विश्वास ठेऊ नये असे आवाहन केले आहे. तसेच फेसबूकवरुन हे आक्षेपार्ह फोटो काढून टाकण्याची प्रक्रियाही सुरु झाली आहे. दरम्यान, या घटनेच्या निषेधार्त आज कोल्हापूरमध्ये बंद पाळण्यात येणार आहे.