रुखवताला मिळाला रेडिमेडचा साज

रुखवत म्हणजे नववधूच्या संस्कृतीचे प्रतीक. विविध साहित्याचा वापर अतिशय कलाकुशलतेने बनविलेल्या वस्तू म्हणजे रुखवत.

शैलेश कर्पे, सिन्नर (नाशिक) - रुखवत म्हणजे नववधूच्या संस्कृतीचे प्रतीक. विविध साहित्याचा वापर अतिशय कलाकुशलतेने बनविलेल्या वस्तू म्हणजे रुखवत. नव्हे नववधूच्या मनातील भावभावना म्हणजेच रुखवत. रुखवताला भलेही विवाह सोेहळ्याच्या मंडपात एका कोपर्‍यात जागा मिळत असेल; परंतु नववधूच्या मनातील एक कोपरा म्हणजे रुखवत. विवाहसोहळ्यात मांडलेले रुखवत म्हणजे एक आपुलकी व कौतुकाचा विषय असतो. मुलीच्या हातातील कलाकुसर, तिच्या संसाराचं छोटसं रूप या रुखवतामधून पाहिले जाते. लग्नात पारंपरिक रुखवत ठेवण्याची पद्धत आजही जोपासली जात असली तरी अलीकडे तयार रुखवतालाही मोठ्या प्रमाणात मागणी होत असल्याचे दिसून येत आहे. विवाह सोहळ्यात आजही रुखवताला महत्त्व दिले जाते. पूर्वी रुखवत बनविण्यासाठी लग्नघरी नियोजित वधू व तिच्या मैत्रिणींची एकच धावपळ असायची. पण हल्लीच्या जमान्यात तयार रुखवत मांडले जात असल्याने त्याचे स्वरूप बदलत आहे. त्याचे कारणही तसेच आहे. हल्ली मुलींना शिक्षण व नोकरीसाठी घराबाहेर पडावे लागते. त्यातच आई-वडील नोकरी करीत असल्याने रोजच काम उरकायची घाई. त्यामुळे विवाह जमला तरी बाजारात मिळणार्‍या तयार वस्तू रुखवत म्हणून आणल्या जातात. बाजारात विविध नावीन्यपूर्ण वस्तूंनी रुखवतांची दुकाने सजली आहेत. त्यामुळे बाजारात खरेदीसाठी लगबग दिसून येते. आजही लग्नाच्या कोपर्‍यात असलेल्या रुखवताकडे अगदी उत्सुकतेने पाहिले जाते. पारंपरिक रुखवत हा नेहमीच कौतुकाचा आणि लक्ष वेधून घेणारा विषय असला तरी सध्याचा जमाना तयार रुखवताचा आहे. त्यामध्ये भांड्याबरोबर विविध इलेक्ट्रॉनिक वस्तू, कलाकुसरीच्या व शोभेच्या वस्तूदेखील दिसून येतात. विवाह सोहळ्यात तयार रुखवत आणण्यासाठी शहरात दिसणारे चित्र आता ग्रामीण भागातही मोठ्या प्रमाणावर दिसू लागले आहे.