प्रेतास घालूनी वस्त्रे, हे सत्य झाकले कोणी...
त्या अग्निमध्ये वितळे, देहाचे फसवे लोणी...
मृत्यूचं वास्तव अशा पंक्तीमधून व्यक्त करणारे अन् शारिरिक वेदनांशी दोस्ती करून मृत्यूला एक उत्सव मानणारे मराठीतील ज्येष्ठ कवी माधव पवार (७१, रा. निर्मिती टॉवर्स, मोदीखाना ) यांचे बुधवारी पहाटे चार वाजता येथील निवासस्थानी निधन झाले. त्यांच्या पश्चात पत्नी, दोन मुले, सूना, नातवंडे असा परिवार आहे. सायंकाळी मोदी स्मशानभूमीत त्यांच्यावर अंत्यसंस्कार करण्यात येणार आहेत.
कवी माधव पवार हे गेल्या बारा ते तेरा वर्षापासून मूत्रपिंडाच्या विकारानं आजारीच होते. पण डायलिसिस करून आल्यानंतर ते साहित्यिक कार्यक्रमांना आवर्जून उपस्थित राहायचे. उत्तम कविता व सूत्रसंचालन ते करायचे. महिन्याभरापूर्वीच त्यांची प्रकृती खुपच खालावली होती. डायलिसिसलाही शरीर प्रतिसाद देत नव्हते. उपचाराची सर्व पध्दती निष्क्रिय ठरल्या होत्या. त्यामुळे त्यांना रूग्णालयातून घरीच ठेवण्याचा व उपचार करण्याचा सल्ला दिला. दिवसेंदिवस प्रकृती ढासळत होती. त्यातच त्यांचे पहाटे प्राणोत्क्रमण झाले.
त्यांच्यावर तब्बल १६०० पेक्षा अधिक डायलिसिस करण्यात आले होते. विशेष म्हणजे त्याच्या वेदनाही त्यांनी काव्यातून व्यक्त करत त्याचा आनंद लुटला. त्यांच्या निधनाने सोलापूरच्या साहित्यिक विश्वावर शोककळा पसरली आहे. एक संवेदनशील कवी, उत्तम तक्ते, नकलाकार, उत्कृष्ट सूत्रसंचालक म्हणून उभ्या महाराष्ट्राला अन् ते सोलापूरकरांना त्यांची ओळख होती. कवी रा.ना. पवार यांचे सुपुत्र म्हणून ओळखीशिवाय कवी माधव पवार यांच्या प्रतिभेचा नावलौकिक साहित्य दरबारात विशेष होता. पार्श्वगायक गायक सुरेश वाडकर, प्रल्हाद शिंदे, आनंद शिंदे, आदर्श शिंदे यांनी कवी माधव पवारांची गीतं, भक्तीगीतं अन् लोकगीतं गायिली आहेत. वात्रटिकाकार रामदास फुटाणे, कविवर्य फ.मुं. शिंदे, गजलकार सुरेश भटांसह दिग्गजांशी त्यांचा स्नेह अधिक चांगला होता. कवीवर्य ग्रेस यांना ते पितृतूल्य मानत. ग्रेस यांचाही त्यांच्यावर विशेष लोभ होता. ग्रेस जेव्हा पुण्यातील रूग्णालयात शेवटचे उपचार घेत होते, तेव्हा माधव पवार आवर्जून तिथे सेवेत होते.
Web Summary : Veteran Marathi poet Madhav Pawar (71) passed away in Solapur due to kidney ailment. Known for his poems on life, death, and pain, he was also a skilled compere and singer. His funeral was held in Modi Smashanbhumi.
Web Summary : मराठी के वरिष्ठ कवि माधव पवार (71) का किडनी की बीमारी के कारण सोलापुर में निधन हो गया। जीवन, मृत्यु और दर्द पर कविताओं के लिए जाने जाते थे, वे एक कुशल सूत्रधार और गायक भी थे। मोदी श्मशानभूमि में अंतिम संस्कार किया गया।