ठाणे - बऱ्याचदा इतर पक्षातील नेते, लोकप्रतिनिधी सत्ताधारी भाजपात प्रवेश करताना दिसतात परंतु मुरबाड नगरपंचायतीत घडलेल्या प्रकाराने भाजपासह मुख्यमंत्री देवेंद्र फडणवीसांनाही मोठा धक्का बसला आहे. मुरबाडमधील भाजपाच्या १० पैकी ९ नगरसेवकांनी स्वतंत्र गट स्थापन केला आहे. या गटाला जिल्हाधिकारी कार्यालयानेही मान्यता दिली आहे. भाजपा नगरसेवकांच्या या खेळीमुळे नगरपंचायतीतील भाजपाचे वर्चस्व संपुष्टात आले आहे. स्थानिक आमदार किसन कथोरे यांच्याविरोधात नगरसेवकांनी ही भूमिका घेतली आहे.
मुरबाडमध्ये मागे झालेल्या निवडणुकीत एकूण १७ नगरसेवकांपैकी १० भाजपाचे, शिवसेनेचे ५ आणि अन्य २ अपक्ष नगरसेवकांनी भाजपाला पाठिंबा दिला त्यामुळे या नगरपंचायतीत नगराध्यक्ष आणि उपनगराध्यक्ष भाजपाचे निवडून आले. परंतु अलीकडेच उपनगराध्यक्ष पदाच्या निवडणुकीवरून भाजपातील मतभेद चव्हाट्यावर आले. उपनगराध्यक्षपदासाठी कथोरे यांनी शिवसेनेच्या नगरसेवकाचे नाव पुढे केले त्याला भाजपा नगरसेवकांनी तीव्र विरोध केला. विशेष म्हणजे प्रत्यक्ष निवडणुकीत भाजपा नगरसेवकांनी अपक्ष उमेदवाराला मतदान करत पक्षाच्या उमेदवाराचा पराभव केला.
भाजपाच्या १० पैकी ९ नगरसेवकांनी मुरबाड परिवर्तन पॅनल असा स्वतंत्र गट स्थापन केला आहे २६ मे रोजी नगरसेवक मोहन गडगे यांच्यावतीने जिल्हाधिकारी कार्यालयात अर्जही करण्यात आला. त्याला गट म्हणून मान्यता देण्यात आली आहे. आता भाजपाच्या गटात पक्षाचा १ आणि समर्थक २ नगरसेवक असतील.
दरम्यान, मुरबाड मतदारसंघात किसन कथोरे हे भाजपाचे आमदार आहेत. त्यांच्यासाठी हा मोठा धक्का आहे. मुरबाड नगरपंचायतीत अशाप्रकारे पक्षातील ९ नगरसेवकांनी स्वतंत्र गट स्थापन केल्याची पुष्टी भाजपा ठाणे ग्रामीण जिल्हाध्यक्ष जितेंद्र डाकी यांनी दिली. उपनगराध्यक्षपदाबाबत काही नगरसेवकांमध्ये नाराजी होती. आम्ही या नाराज नगरसेवकांच्या संपर्कात आहोत. भाजपा प्रदेशाध्यक्षांच्या उपस्थितीत लवकरच या नाराज नगरसेवकांची बैठक घेणार असून ज्या अडचणी असतील त्या दूर केल्या जातील असं डाकी यांनी स्पष्ट केले.