Ashok Kharat Case: अशोक खरातच्या अटकेनंतर राजकीय भूकंप; चाकणकरांच्या राजीनाम्यावर सुनील तटकरे काय म्हणाले?

Sunil Tatkare On Rupali Chakankar: नाशिकमधील स्वयंघोषित महाराज अशोक खरात याच्या अटकेनंतर महाराष्ट्रातील राजकीय वातावरण चांगलेच तापले आहे.

नाशिकमधील स्वयंघोषित महाराज अशोक खरात याच्या अटकेनंतर महाराष्ट्रातील राजकीय वातावरण चांगलेच तापले आहे. खरातवर बलात्काराचे गंभीर आरोप झाले असून, त्याच्यासोबतचे राजकीय नेत्यांचे फोटो आता चर्चेचा विषय ठरत आहेत. विशेषतः राज्य महिला आयोगाच्या अध्यक्षा रुपाली चाकणकर या खरातची पाद्यपूजा करतानाचे फोटो व्हायरल झाल्याने विरोधकांनी त्यांच्या राजीनाम्याची आक्रमक मागणी केली आहे. या पार्श्वभूमीवर राष्ट्रवादी काँग्रेसचे (अजित पवार गट) प्रदेशाध्यक्ष सुनील तटकरे यांनी दिलेली प्रतिक्रिया सध्या चर्चेत आहे.

भविष्य सांगण्याच्या नावाखाली महिलांची फसवणूक आणि लैंगिक शोषण केल्याच्या आरोपाखाली नाशिक पोलिसांनी अशोक खरातला अटक केली आहे. अटकेनंतर खरातचे अनेक बड्या नेत्यांसोबतचे संबंध उघड झाले आहेत. मात्र, महिलांच्या हक्कासाठी काम करणाऱ्या रुपाली चाकणकर या अशोक खरात यांच्या चरणी लीन झाल्याचे फोटो समोर आल्याने नैतिकतेच्या मुद्द्यावरून विरोधकांनी सरकारला धारेवर धरले आहे.

या सर्व वादावर पत्रकारांनी सुनील तटकरे यांना गाठले असता, त्यांनी या विषयावर सविस्तर भाष्य करणे टाळले. रुपाली चाकणकर यांच्या राजीनाम्याच्या मागणीबद्दल विचारले असता तटकरे म्हणाले की, "मी योग्य वेळी त्यावर बोलेन. मला बोलण्याचा अधिकार घटनेने दिला आहे. त्यामुळे मला ज्यावेळी जेवढे बोलायचे आहे, तेवढेच मी बोलेन. तसेच मला जेव्हा त्या विषयावर बोलायचे असेल, तेव्हा मी नक्कीच बोलेन."

सुनील तटकरे यांनी 'योग्य वेळी बोलेन' असे म्हणून सध्या तरी या वादापासून अंतर राखल्याचे दिसत आहे. मात्र, एकीकडे खरातचे कारनामे समोर येत असताना आणि दुसरीकडे चाकणकर यांच्यावर टीकेची झोड उठत असताना, पक्ष यावर काय अधिकृत भूमिका घेतो? याकडे सर्वांचे लक्ष लागले आहे.