NEET Paper Leak Case: लातूरमधून निवृत्त प्राध्यापक सीबीआयच्या ताब्यात; पुणे कनेक्शन उघड, तपासाला वेग

पेपर सेटिंगमधील विषयतज्ज्ञ सीबीआयच्या रडारवर; लातूरच्या घरातून निवृत्त प्राध्यापक उचलले!

लातूर : नीट पेपरफुटीच्या प्रकरणात सीबीआयच्या पथकाने पुणे तसेच लातूर येथे वास्तव्याला असलेले सेवानिवृत्त प्रा. पी.व्ही. कुलकर्णी यांना गुरुवारी लातूरच्या घरातून ताब्यात घेतले. दरम्यान, प्राथमिक चौकशी केल्यानंतर पथक निवृत्त प्राध्यापकास सोबत घेऊन पुण्याकडे रवाना झाले आहे. या संपूर्ण कारवाईत स्थानिक पोलिस सोबत होते, मात्र त्यांनी गोपनीयता ठेवत कोणतीही माहिती दिली नाही. परंतु, पुणे येथून कारवाईचे सूत्र हलत असल्याची खबर शैक्षणिक क्षेत्रात चर्चिली जात होती.

गुरुवारी पहाटेच सीबीआयचे पथक लातुरात धडकले होते. त्यांनी निवृत्त प्राध्यापक पी.व्ही. कुलकर्णी यांच्या लातूर येथील पद्मावती नगर येथील निवासस्थानी जाऊन चौकशी सुरू आहे. त्यांचे पुणे येथेही घर असून, चौकशीत नेमकी कोणती माहिती हाती आली, याची स्पष्टता झालेली नाही. सीबीआय पथक तसेच पोलिसांकडून शेवटपर्यंत गोपनीयता पाळण्यात आली.

पेपर सेटिंग प्रक्रियेत सहभाग?
प्रा.पी.व्ही. कुलकर्णी हे केमिस्ट्री विषयतज्ज्ञ असून, त्यांचा नीट पेपर सेटिंग प्रक्रियेत सहभाग होता, अशी माहिती शिक्षण क्षेत्रात चर्चिली जात आहे. परंतु, त्याला तपास यंत्रणांनी अद्यापि दुजोरा दिला नसला तरी पथकाने दुपारपर्यंत चौकशी केली आणि त्यानंतर पथक त्यांना सोबत घेऊन पुण्याला गेल्याने चर्चेला उधाण आले आहे.

दोन्ही प्रकरणे वेगवेगळी
आधीपासूनच प्रश्न जुळल्याच्या प्रकरणात कोचिंग क्लासच्या दिशेने सुरू असलेला स्थानिक पोलिसांचा तपास आणि सीबीआय यंत्रणेने शोध घेतलेले निवृत्त प्राध्यापकाचे प्रकरण हे दोन्ही वेगवेगळे असल्याची प्राथमिक माहिती आहे. दरम्यान, स्थानिक पोलिसांनी अद्यापपर्यंत समुपदेशक, विद्यार्थी, पालक आणि कोचिंग क्लासेसमधील व्यक्ती अशा एकूण सहा जणांची चौकशी करून जबाब घेतले आहेत. त्यात मिळालेल्या माहितीची गुरुवारीही पडताळणी सुरू होती. नव्याने कोणाचेही जबाब घेण्यात आलेले नाहीत. याशिवाय, सीबीआय कारवाईच्या तपशिलाबाबत भाष्य करू शकत नाही, असे वरिष्ठ पोलिस अधिकारी म्हणाले.