जळकोट येथे आयोजित आढावा बैठकीत ते बोलत होते. यावेळी ग्रामीण रुग्णालयाचे अधीक्षक डॉ. जगदीश सूर्यवंशी, तालुका वैद्यकीय अधिकारी डॉ. संजय पवार, तहसीलदार संदीप कुलकर्णी, गटविकास अधिकारी चंद्रहार ढोकणे, नगरपंचायतीच्या मुख्याधिकारी उज्ज्वला शिंदे, डॉ. बिरादार, डॉ. कुंटे, सत्यकांत थोटे आदी उपस्थित होते.
उपजिल्हाधिकारी मेंगशेट्टी म्हणाले, येथील कोविड सेंटरमध्ये नवीन १०० खाटांची व्यवस्था करण्यात येणार आहे. ऑक्सिजनचा पुरवठा भरपूर आहे. त्यामुळे रुग्णांची गैरसोय होणार नाही, याची काळजी घेण्यात येत आहे. लवकरच या ठिकाणी वरिष्ठांच्या आदेशानुसार व मंजुरीनुसार दोन तज्ज्ञ डॉक्टर आणि व्हेंटिलेटरची व्यवस्था करण्यात येईल. त्यामुळे जळकोटातील रुग्णांना अन्यत्र उपचारासाठी जाण्याची गरज नाही.
१ हजार १९० जणांची कोरोनावर मात...
सध्या जळकोट तालुक्यात एकूण कोरोना बाधितांची नोंद १ हजार ४८७ अशी असून त्यातील १ हजार १९० जण उपचारानंतर ठणठणीत झाले आहेत. सध्या ॲक्टिव्ह रुग्ण २७१ आहे. कोरोनामुळे २६ जणांचा मृत्यू झाला आहे. २०७ जण होम आयसोलेशनमध्ये आहेत. ३५ रुग्णांना उदगीर, लातूरला रेफर करण्यात आले आहे. जळकोटच्या कोविड केअर सेंटरमध्ये २७ उपचार सुरू असल्याची माहिती डॉ. जगदीश सूर्यवंशी व डॉ. संजय पवार यांनी दिली.
सध्या जळकोट शहरासह तालुक्यात कोरोना संसर्गाचा आलेख कमी झाला आहे. मात्र, अशा कालावधीत नागरिकांनी आरोग्याची काळजी घ्यावी, असे आवाहन आरोग्य विभागाकडून करण्यात आले आहे.