NEET Paper Leak: लातुरात काेचिंग क्लासच्या सराव परीक्षेतील ४२ प्रश्न सारखे; पालकाची तक्रार

लातुरात ‘नीट’ पेपरफुटीच्या अनुषंगाने चाैकशीचे दिले आदेश

लातूर : शहरातील एका काेचिंग क्लासने घेतलेल्या ‘नीट’ परीक्षापूर्व सराव परीक्षेतील एकूण ४२ प्रश्न सारखे (समान) असल्याची तक्रार एका विद्यार्थिनीच्या पालकाने मंगळवारी रात्री नीट पेपरफुटीच्या पार्श्वभूमीवर जिल्हा पाेलिस अधीक्षक अमाेल तांबे यांच्याकडे प्रत्यक्ष हजर राहून केली आहे. याबाबत पाेलिस अधीक्षकांनी तातडीने चाैकशीचे आदेश दिले आहेत.

पाेलिस प्रशानाने दिलेल्या प्रसिद्ध पत्रकात म्हटले आहे. रविवार, वैद्यकीय प्रवेशपूर्व परीक्षा ‘नीट’ (नॅशनल एलिजिबिटी एन्टरन्स टेस्ट) घेण्यात आली हाेती. नीट-२०२६ पेपरफुटीच्या अनुषंगाने प्राप्त तक्रारीमध्ये पोलिस अधीक्षकांनी तातडीने चाैकशीचे आदेश दिले आहेत. मंगळवार, १२ मे २०२६ रोजी पोलिस अधीक्षक कार्यालय, लातूर येथे एका विद्यार्थिनीचे पालक यांनी प्रत्यक्ष हजर हाेऊन ही तक्रार दिली आहे. तक्रारीत पालकाने म्हटले आहे, की नीट-२०२६ चा पेपर होण्यापूर्वी लातूर येथील एका काेचिंग क्लास चालकाने एक मॉक टेस्ट पेपर त्यांच्या क्लासमधील विद्यार्थ्यांना दिला हाेता. त्या पेपरमधून ४२ प्रश्न हे नीट (यूजी) २०२६ या पेपरमध्ये जशाच्या तसे (समान) आलेले होते. दरम्यान, मंगळवारी ‘नीट’ची झालेली परीक्षा पेपरफुटीमुळे रद्द करण्याचा निर्णय घेण्यात आला. त्याअनुषंगाने लातूर येथील एका काेचिंग क्लासेसचा या पेपर फुटीच्या प्रकरणांमध्ये समावेश असल्याची शक्यता तक्रारीमध्ये पालकाने नमूद केली आहे.

या तक्रारीचे गांभीर्य लक्षात घेत पोलिस अधीक्षक अमोल तांबे यांनी लातूर शहराचे डीवायएसपी समीरसिंह साळवे यांना सदर तक्रार अर्जाच्या अनुषंगाने तातडीने चौकशी करून दोषीविरुद्ध कायदेशीर कारवाई करण्याचे आदेश दिले आहेत.