भीमगोंडा देसाई
कोल्हापूर : चार सदस्यप्रभाग रचनेनुसार कोल्हापूर महापालिका निवडणूक होणार असल्याने २० प्रभाग होणार आहेत. एका प्रभागात पाच तर उर्वरित १९ प्रभागात चार सदस्य असणार आहेत. अलीकडची म्हणजे सन २०११ च्या जनगणनेतील लोकसंख्या आणि मतदार संख्येनुसार प्रभाग रचना होणार आहे. यानुसार २० प्रभागांत ८१ नगरसेवक जातील, असे महापालिका निवडणूक प्रशासनातर्फे बुधवारी सांगण्यात आले. दरम्यान, प्रभाग रचनेची प्रकिया सुरू झाली आहे. आज, गुरुवारी प्रशासक के. मंजुलक्ष्मी यासाठी बैठक घेणार आहेत.
राज्यातील ड वर्ग महापालिकेसंबंधी नगरविकास विभागाने मंगळवारी काढलेल्या आदेशानुसार महापालिकेची निवडणूक चार सदस्य प्रभाग रचनेनुसार होणार आहे. शहरात जर वीस प्रभाग झाले तर एका प्रभागात चार सदस्य वाढतील, पण एकूण नगरसेवकांची संख्या मावळत्या नगरसेवक इतकीच राहणार आहे. यावेळी एका प्रभागात सरासरी २० ते २४ हजार मतदार असतील, असे अधिकारी सांगतात. प्रत्यक्षात प्रभाग रचना अंतिम झाल्यानंतर मतदारसंख्याही स्पष्ट होणार आहे.
प्रशासक प्रसिद्ध करणार प्रभाग रचना
प्रारूप प्रभाग रचना तयार करून जिल्हाधिकाऱ्यांकडे देणे, राज्य निवडणूक आयुक्तांनी प्राधिकृत केलेल्या अधिकाऱ्यांकडून मान्यता घेणे, प्रारूप प्रभाग रचना प्रसिद्ध करणे, प्रारूप प्रभाग रचनेवर हरकती घेणे, सुनावणीनंतर अंतिम मान्यता घेण्यात येणार आहे. अंतिम प्रभाग रचना प्रशासक प्रसिद्ध करणार आहेत.
प्रभागाची सीमारेषा अशा असतील..
प्रभागाची सीमारेषा, मोठे रस्ते, गल्ल्या, नद्या, नाले, डोंगर, रस्ते, रेल्वे रूळ याचा विचार प्रभाग रचनेत करण्यात येणार आहे. कोणत्याही परिस्थितीत प्रभाग रचना करताना एका इमारतीचे, चाळीचे, घराचे विभाजन दोन प्रभागांत होणार नाही, याची दक्षता घ्यावी लागणार आहे. प्रभागाच्या सीमेचे वर्णन करताना रस्ते, रेल्वे, नाले, नद्या, सीटी सर्व्हे असा करण्यात येणार आहे.
गुगल मॅपवरील नकाशाद्वारे
गुगल मॅपवरून प्रभागाची नकाशा तयार करण्यात येणार आहे. प्रभागाचे क्षेत्र तत्काळ लक्षात येण्यासाठी प्रभागांना अनुक्रमांकासोबतच प्रभागाचे नाव देण्यासंबंधीही विचार करण्यात येणार आहे. पण प्रभागाला नाव देणे बंधनकारक केलेेले नाही. प्रशासक नावासंबंधी निर्णय घेणार आहेत.