पनोरी-लिंगाचीवाडीदरम्यान दोन मुलांचा अपहरणाचा प्रयत्न

लिंगाचीवाडी येथील मुले शिक्षणासाठी पनोरी चालत येत असतात.

नेहमीप्रमाणे साहिल पाटील व अविष्कार पाटील हे दोन विद्यार्थी शाळेला चालत येत होते. निर्जन ठिकाणी आल्यानंतर एक मॅक्स गाडी आली. गाडीत एक पुरुष व दोन महिला होत्या. त्यांनी मुलांना गाडीत बसण्यासाठी दमदाटी केली. परंतु मुलांनी स्पष्ट नकार दिला. तरीदेखील त्यांची जोरजबरदस्ती सुरूच होती. याचवेळी रस्त्यावरून येणाऱ्या एका व्यक्तीच्या हा प्रकार लक्षात येताच त्यांनी आरडाओरडा करताच अपहरण करणारे तात्काळ पनोरीच्या दिशेने निघून गेले.

या घटनेमुळे पनोरी परिसरात घबराट पसरली असून, याची माहिती राधानगरी पोलिसांना देण्यात आली आहे. दरम्यान, या घटनेमुळे पालक, विद्यार्थी यांनी दक्ष राहावे, असे आवाहन पनोरीचे सरपंच तुकाराम परीट व उपसरपंच स्वप्निल पातले यांनी केले आहे.