"डोनाल्ड ट्रम्प यांनी पदाची प्रतिष्ठा घालवली"; 'भारताला नरक' म्हणताच अमेरिकन खासदार कृष्णमूर्ती भडकले

अमेरिकेचे अध्यक्ष डोनाल्ड ट्रम्प यांनी भारताबद्दल केलेल्या विधानाचे पडसाद उमटले आहे. भारतीय वंशाचे अमेरिकेतील डेमोक्रटिक पक्षाचे खासदार राजा कृष्णमूर्ती यांनी यावरून ट्रम्प यांना सुनावले. 

"डोनाल्ड ट्रम्प यांनी भारताबद्दल आणि अनिवासी परदेशी नागरिकांबद्दल केलेलं विधान हे वर्णभेदाला बळ देणारे आणि अध्यक्ष पदाची प्रतिष्ठा घालवणार आहे", असा संताप डेमोक्रटिक पक्षाचे भारतीय वंशाचे खासदार राजा कृष्णमूर्ती यांनी व्यक्त केला. डोनाल्ड ट्रम्प यांनी भारताचा उल्लेख नरक असा केला होता. 

भारतीय वंशाचे अमेरिकेतील खासदार राजा कृष्णमूर्ती यांनी म्हटले आहे की, "डोनाल्ड ट्रम्प यांची भाषा फक्त लाखो भारतीय वंशाच्या अमेरिकन नागरिकांचा आणि आपल्या सगळ्या महत्त्वाच्या जागतिक भागीदार देशाचा अपमान करणारी नाहीये, तर हे अमेरिकेच्या संधी आणि संशोधनाला चालना देणाऱ्या मुल्यांनाही कमकुवत करणारी आहे."

खासदार कृष्णमूर्तींनी काय दिला सल्ला?

खासदार कृष्णमूर्ती म्हणाले की, "अमेरिकेने भारतासोबतची भागीदार आणखी मजबूत केली पाहिजे. फक्त आपल्या राजकीय फायद्यासाठी दुफळी निर्माण होईल अशा गोष्टीला प्रोत्साहन न देता, आपल्या विविधतेचा आपल्या देशाने सन्मान केला पाहिजे."

अमेरिकेचे अध्यक्ष डोनाल्ड ट्रम्प यांनी भारत आणि चीन हे पृथ्वीवरील नरक असल्याचे म्हटले. त्यांच्या या विधानावरून प्रचंड संताप व्यक्त होत आहे. भारत सरकारने या मुद्द्यावर मांडलेल्या भूमिकेवर विरोधी पक्षांनी टीका केली आहे. काँग्रेसने म्हटले आहे की, भारताचा सातत्याने अपमान केला जात आहे कारण पंतप्रधान घाबरलेले आहेत. कमकुवत आहेत आणि दबावाखाली आहेत. 

इराणचे ट्रम्प यांच्यावर टीकास्त्र

इराणने ट्रम्प यांच्या विधानावर तिखट प्रतिक्रिया दिली आहे. "ट्रम्प यांच्यासाठी कल्चर डिटॉक्स बूक करुन दिलं पाहिजे. कदाचित त्यामुळे त्यांची विनाकारणची बडबड थांबेल", असे इराणने म्हटले आहे.