तर डॉ. राजेश पाटील यांच्या फिर्यादीवरून सतीश विश्वासराव मोरे, आनंदराव वाल्मीक मराठे व अनिल (पूर्ण नाव नाही) यांच्याविरुध्द दंगल व मारहाणीचा गुन्हा दाखल झाला आहे.
१) प्राध्यापिकेने दिलेल्या फिर्यादीनुसार प्राध्यापिका, त्यांचे पती व इतर काहीजण १ फेब्रुवारी रोजी रात्री जेवण झाल्यानंतर ९.३० वाजता मेहरुण तलावाकाठी फिरायला गेले असता हायमास्ट लॅम्पच्या उजेडात त्यांच्यासमोर डॉ. राजेश पाटील लघुशंका करीत होते. त्याचा जाब विचारला असता, तुमच्या बापाची जागा आहे का, सगळ्यांसमोर मला खुल्या जागेत लघुशंका करायला आवडते, असे म्हणत आरडाओरड करायला सुरुवात केली. मोबाईलमध्ये फोटो घेतो आणि पोलिसांना पाठवितो असे म्हणताच डॉक्टरांनी सतीश मोरे यांना मारहाण करायला सुरुवात केली. प्राध्यापिकेने हा वाद सोडविण्याचा प्रयत्न केला असता डॉक्टरने त्यांचा हात पकडून दुचाकीवरून पळून जाण्याचा प्रयत्न केला. पुढे गल्लीतील आनंदराव मराठे व इतरांनी त्यांना अडविले असता डॉक्टर व सोबतच्या दोघांनी त्यांनाही मारहाण केली, असे प्राध्यापिकेच्या फिर्यादीत म्हटले आहे.
२) डॉ. राजेश पाटील यांनी दिलेल्या फिर्यादीत म्हटले आहे की, मेहरुण तलावाकाठी व्यायाम झाल्यानंतर रात्री ९.३० वाजता लघुशंका आल्याने सोबतचे अजय सोनवणे यांना थांबवून मोकळ्या जागेत कोणी येत नसल्याची खात्री करून लघुशंका केली. त्यानंतर मोकळ्या जागेत आल्यावर कोणीतरी माझा फोटो काढू लागला, त्यास जाब विचारला असता त्या व्यक्तीने अर्वाच्य भाषेत शिवीगाळ केली. त्याकडे दुर्लक्ष करून पुढे जायला लागल्यावर ही व्यक्ती पुन्हा समोर येऊन फोटो काढायला लागली. त्यास नम्रपणे समजावून सांगण्याचा प्रयत्न केला, परंतु ते ऐकण्याच्या मन:स्थितीत नव्हते. १० ते १२ जणांना बोलावून त्यांनी लाठ्याकाठ्यांनी मारहाण केली व त्यात एकाने लाथ मारल्याने कारवर जाऊन आदळलो. काही जणांनी धरून ठेवत मारहाण केली. मित्र अजय सोनवणे यांनी सोडविण्यासाठी विनवण्या केल्या. खुशाल जावळे व इतर मित्र तेथे आले व त्यांनी या लोकांच्या तावडीतून सोडविले. या घटनेत डोक्याला जबर दुखापत झाल्याचे डॉक्टरांनी फिर्यादीत म्हटले आहे.