जालन्यातील ४०० एकरवरील भव्य ड्रायपोर्टचे काम पूर्ण, पण एनओसीअभावी प्रतीक्षा कायम

देशातील पहिल्या जालना ड्रायपोर्टचे संचलन लांबणीवर; प्रदूषण मंडळाची एनओसी आणि रेल्वे कागदपत्रांमुळे खोळंबा

छत्रपती संभाजीनगर : मराठवाड्यासाठी अत्यंत महत्त्वाच्या असलेल्या जालना ड्रायपोर्टचे संचलन महिनाभर लांबणीवर पडल्याची माहिती वरिष्ठ सूत्रांनी दिली. महाराष्ट्र प्रदूषण नियंत्रण मंडळाच्या स्थानिक ना हरकत प्रमाणपत्र आणि रेल्वेसंबंधित किरकोळ कागदपत्रांची पूर्तता करण्यास विलंब झाल्याने ड्रायपोर्ट कार्यान्वित करण्यास वेळ लागत असल्याचे वरिष्ठ सूत्रांनी सांगितले.

जालना येथे उभारण्यात आलेला ड्रायपोर्ट एप्रिल महिन्यापासून कार्यान्वित होईल असे बोलले जात होते. हा ड्रायपोर्ट कार्यान्वित झाल्यास छत्रपती संभाजीनगर आणि जालना तसेच मराठवाड्यातील अन्य जिल्ह्यांतील उद्योजक, शेतकरी यांना त्यांचा निर्यातक्षम माल विदेशात पाठवणे सहज शक्य होणार आहे. मराठवाड्यातून सुमारे २५ ते ३० हजार कोटी रुपये किमतीच्या मालाची निर्यात दरवर्षी होत असते. मात्र, हा माल आतापर्यंत कंटेनर, ट्रकमधून मुंबईतील जवाहरलाल नेहरू पोर्ट ट्रस्टमध्ये पाठविला जातो. तेथे कस्टम क्लिअरन्स झाल्यानंतर माल विदेशात पाठविला जातो. जेएनपीटीमधून माल निर्यात करताना उद्योजकांना अनेक अडचणींचा सामना करावा लागतो. ही बाब लक्षात घेऊन सन २०१४पासून जालना शहराजवळच ४००एकरवर ड्रायपोर्ट उभारण्याचा निर्णय घेण्यात आला होता. आता या ड्रायपोर्टचे काम पूर्ण झाले.

६४ एकर परिसरात ड्रायपोर्टसाठी आवश्यक त्या सुविधा उपलब्ध करण्यात आल्या. दिनेगाव ते ड्रायपोर्ट अशी स्वतंत्र रेल्वेलाईन टाकण्यात आली. उभारण्यात आलेल्या ड्रायपोर्ट मध्येच कस्टम विभागाचे कार्यालय आहे. तेथून रेल्वेने अथवा कंटेनरमधून थेट माल जहाजावर पाठविणे शक्य होणार आहे. यामुळे मराठवाड्यासाठी हा ड्रायपोर्ट खूप महत्त्वाचा आहे. विकास कोल या खासगी कंपनीकडे १५ वर्षांसाठी या ड्रायपोर्टचे संचलन सोपविण्यात आले आहे.

एनओसी मिळताच ड्रायपेार्ट सुरू
जालना ड्रायपोर्टसाठी स्थानिक प्रदूषण नियंत्रण मंडळाची एनओसी आणि रेल्वे विभागाशी संबंधित काही कागदपत्रांची पूर्तता करण्यास विलंब झाल्याने ड्रायपोर्टचे संचलन करता आले नाही. पुढील काही दिवसांत ही पूर्तता करून एनओसी मिळताच ड्रायपेार्ट सुरू होईल.
-विकास मलिक, वरिष्ठ अधिकारी, एमएमएलपी.