"लोकांना माझं बोलणं आवडत नाही, पण..." जिनपिंग यांची स्तुती करताना ट्रम्प यांनी विरोधकांना असं झापलं!

डोनाल्ड ट्रम्प आणि शी जिनपिंग यांची बीजिंगमध्ये ऐतिहासिक भेट झाली. दोन्ही नेत्यांनी मैत्रीचा हात पुढे करत जगाचे भविष्य बदलण्याचे वक्तव्य केले आहे.

जागतिक महासत्ता असलेल्या अमेरिका आणि चीनमधील संबंधांनी आता एक नवे वळण घेतले आहे. अमेरिकेचे राष्ट्राध्यक्ष डोनाल्ड ट्रम्प आणि चीनचे राष्ट्राध्यक्ष शी जिनपिंग यांच्यातील द्विपक्षीय बैठकीत दोन्ही नेत्यांनी "मैत्री आणि सहकार्या"वर भर दिला. "आम्ही मिळून जगाचे भविष्य बदलू," असा विश्वास व्यक्त करत दोन्ही नेत्यांनी एकमेकांवर स्तुतिसुमने उधळली. या भेटीकडे संपूर्ण जगाचे लक्ष लागले असून, व्यापार आणि जागतिक शांततेच्या दृष्टीने हा दौरा अत्यंत महत्त्वाचा मानला जात आहे.

"तुम्ही महान नेते आहात!"; ट्रम्प यांच्याकडून जिनपिंग यांचे कौतुक

दौऱ्याच्या दुसऱ्या दिवशी झालेल्या बैठकीत डोनाल्ड ट्रम्प यांनी शी जिनपिंग यांच्या नेतृत्वाचे मुक्तकंठाने कौतुक केले. ट्रम्प म्हणाले की, "आमचे एकमेकांशी असलेले संबंध खूप चांगले आहेत. जेव्हाही एखादी समस्या आली, तेव्हा आम्ही फोनवर बोलून ती तातडीने सोडवली. कोणत्याही दोन राष्ट्राध्यक्षांमध्ये असलेलं हे आतापर्यंतचं सर्वात प्रदीर्घ आणि घनिष्ठ नातं आहे, असं मला वाटतं. मी सर्वांना सांगू इच्छितो की, जिनपिंग हे एक महान नेते आहेत. काही लोकांना माझे हे बोलणे आवडत नाही, पण मी हे सत्य वारंवार बोल राहीन."

बिझनेस टायकुन्सचा ताफा सोबत

ट्रम्प यांनी केवळ राजकीय चर्चाच केली नाही, तर अमेरिकेतील बड्या उद्योगपतींनाही सोबत नेले आहे. "मला कंपन्यांमधील दुसऱ्या किंवा तिसऱ्या क्रमांकाचे लोक नको होते, तर फक्त 'टॉप'चे लोक हवे होते. हे सर्वजण चीनसोबत व्यापार करण्यास उत्सुक आहेत," असे ट्रम्प यांनी बैठकीत नमूद केले.

'थ्यूसीडाइड्स ट्रॅप'चा उल्लेख आणि जिनपिंग यांचा संयम

चीनचे राष्ट्राध्यक्ष शी जिनपिंग यांनीही ट्रम्प यांचे ९ वर्षांनंतर चीनमध्ये स्वागत करताना जागतिक परिस्थितीवर भाष्य केले. त्यांनी विचारले की, "चीन आणि अमेरिका ‘थ्यूसीडाइड्स ट्रॅप’मधून बाहेर पडून मोठ्या राष्ट्रांच्या संबंधांचा एक नवा आदर्श निर्माण करू शकतात का?"

थ्यूसीडाइड्स ट्रॅप म्हणजे काय?

जेव्हा एखादी उदयास येणारी महासत्ता प्रस्थापित महासत्तेला आव्हान देते, तेव्हा त्यांच्यात संघर्ष किंवा युद्ध अटळ असते, यालाच थ्यूसीडाइड्स ट्रॅप म्हणतात.

आम्ही शत्रू नाही, सहकारी आहोत!

शी जिनपिंग यांनी स्पष्ट केले की, चीन आणि अमेरिका हे एकमेकांचे प्रतिस्पर्धी नसून सहकारी आहेत. "दोन्ही देशांच्या संघर्षात जगाचे नुकसान आहे आणि सहकार्यात फायदा. आपल्यातील मतभेदांपेक्षा आपले समान हितसंबंध जास्त महत्त्वाचे आहेत," असे जिनपिंग यांनी ठामपणे सांगितले.