जगापासून लपवले, सॅटेलाइटने सगळे टिपले; इराण हल्ल्यात अमेरिकेची १५ तळावरील २२८ ठिकाणे बेचिराख

America Iran War: इराण युद्धामुळे अमेरिकेला ४ लाख कोटींचा खर्च आला असून, ४०० सैनिक जखमी झालेत. ट्रम्प प्रशासन मान्य करत नसले तरी नुकसान भयंकर मोठे असल्याचे म्हटले जात आहे.

America Iran War: इराण युद्धामुळे अमेरिकेचे मोठे नुकसान झाल्याचे सांगितले जात होते. पण प्रत्यक्षात हा आकडा आणखी मोठा असल्याचे आता समोर येत आहे. अमेरिकेचे राष्ट्राध्यक्ष डोनाल्ड ट्रम्प यांनी जगापासून कितीही लपवायचा प्रयत्न केला, तरी सॅटेलाइट फोटोंमधून सगळे सत्य बाहेर आल्याचे म्हटले जात आहे. अमेरिकेच्या विविध १५ तळांवरील सुमारे २२८ ठिकाणे इराणच्या हल्ल्यात उद्ध्वस्त झाल्याचे मीडिया रिपोर्टमधून पुढे आले आहे. 

सॅटेलाइटद्वारे घेतलेल्या छायाचित्रांच्या नव्या विश्लेषणातून हे उघड झाले आहे की, इराणने मध्य पूर्वेतील अमेरिकेच्या लष्करी तळांवर आतापर्यंतचे सर्वात घातक हल्ले केले आहेत. वॉशिंग्टन पोस्टच्या एका अहवालानुसार, युद्धाच्या सुरुवातीपासून आतापर्यंत किमान २२८ लष्करी संरचना आणि उपकरणे नष्ट झाली आहेत किंवा त्यांचे मोठ्या प्रमाणात नुकसान झाले आहे, ही संख्या अमेरिकन सरकारने जाहीरपणे मान्य केलेल्या संख्येपेक्षा खूपच जास्त आहे. इराणच्या हल्ल्यांमध्ये केवळ इमारतींनाच लक्ष्य केले गेले नाही, तर अमेरिकेच्या 'डिजिटल नर्व्हस सिस्टीम'वर, म्हणजेच तिच्या दळणवळण आणि सुरक्षा प्रणालींवर थेट हल्ला करण्यात आला. 

सौदी अरेबिया, कुवैत, बहरीन, कतार येथे मोठे नुकसान

सौदी अरेबियातील प्रिन्स सुलतान हवाई तळावर इंधन भरणाऱ्या टँकर विमानांचे आणि ई-३ सेंट्री विमानांचे नुकसान झाले आहे. कुवैत आणि बहरीनमध्ये तैनात असलेल्या पॅट्रियट क्षेपणास्त्र संरक्षण प्रणाली आणि जॉर्डन व संयुक्त अरब अमिरातीमधील रडार उपकरणांना लक्ष्य करण्यात आले. अनेक तळांवर इंधन डेपो, सैनिकांच्या निवासस्थाने, व्यायामशाळा आणि भोजनगृहे यांचाही विध्वंस झाला आहे. कतारच्या अल-उदैद हवाई तळावरील महत्त्वाच्या उपग्रह दळणवळण केंद्रांचे आणि रडार डोम्सचे मोठ्या प्रमाणात नुकसान झाले आहे. 

सात अमेरिकन सैनिक ठार, ४०० हून अधिक जखमी

अमेरिकन प्रशासनाने नुकसानीची आकडेवारी खूपच कमी करून सांगितली आहे. डोनाल्ड ट्रम्प यांनी विजयाचा दावा केला असला तरी वस्तुस्थिती अशी आहे की, बहरीनमधील अमेरिकन नौदलाच्या ५ व्या फ्लीटचे मुख्यालय आणि कुवेतमधील तीन प्रमुख तळांना निम्म्याहून अधिक नुकसान सोसावे लागले. या युद्धात किमान सात अमेरिकन सैनिक ठार झाले असून ४०० हून अधिक जखमी झाल्याचे म्हटले जात आहे. 

४ लाख कोटी रुपयांचे अमेरिकेला नुकसान

या युद्धात अमेरिकेला आतापर्यंत अंदाजे २५ अब्ज डॉलर्सचा खर्च आला, असे म्हटले जात असले तरी, काही गोपनीय सूत्रांच्या मते, वास्तविक नुकसान ४०-५० अब्ज डॉलर्स (अंदाजे ४ लाख कोटी रुपये) असू शकते. या प्रचंड विध्वंसामुळे अमेरिकेने अनेक तळांवरील कर्मचारी संख्या कमी केली आहे. वाटाघाटीतून तोडगा काढण्याच्या प्रयत्नात अध्यक्ष ट्रम्प यांनी काही लष्करी कारवाया थांबवण्याचे आवाहन केले असले तरी, जमिनीवरील तणाव कमी होण्याची शक्यता कमी दिसते.

दरम्यान, संरक्षण तज्ज्ञांच्या मते, इराणने अमेरिकेसाठी सर्वांत जास्त सामरिकदृष्ट्या खर्चिक आणि दुर्मिळ असलेली लक्ष्ये जाणीवपूर्वक निवडली. रडार यंत्रणांवर थेट हल्ला करण्याऐवजी, त्यांनी डेटा प्रोसेसिंग, कूलिंग सिस्टिम आणि वीज निर्मिती सुविधा असलेल्या इमारतींना लक्ष्य केले. याचा अर्थ असा की, जरी रडार शाबूत राहिले तरी, त्यांना चालवणारी यंत्रणा नष्ट करण्यात आली आहे.