वळणार नियंत्रण सुटल्याने कार उलटली; सासुरवाडीस जाणाऱ्या वकीलाचा जागीच मृत्यू

औंढा ते हिंगोली रस्त्यावरील पिंपळदरी फाटा येथील घटना

औंढा नागनाथ (जि. हिंगोली): वळणावर कारचे नियंत्रण सुटल्यामुळे रस्त्याच्याकडेला असलेल्या नाल्यात कार उलटली झाली. बुधवारी रात्री औंढा ते हिंगोली रस्त्यावरील पिंपळदरी फाट्यानजीक झालेल्या या भीषण अपघातात सासुरवाडीकडे जात असलेल्या वकिलाचा जागीच मृत्यू झाला. सोपान भगवानराव ढोबळे (वय २९, रा. असोला) असे मृत वकिलाचे नाव आहे. 

ॲड. सोपान ढोबळे हे सासुरवाडी असलेल्या सेनगावकडे एकटेच कार (क्र. एडी ३१४८) ने जात होते. नियंत्रण सुटल्याने पिंपळदरी फाट्याजवळ कार रस्त्यालगतच्या नालीत उलटली. अपघाताची माहिती मिळताच पोलिस निरीक्षक जी.एस. राहिरे, जमादार दिलीप नाईक यांच्यासह कर्मचाऱ्यांनी अपघातस्थळी धाव घेतली. दुर्घटनाग्रस्त कारमधून गंभीर जखमी ढोबळे यांना बाहेर काढून पोलिसांनी औंढा ग्रामीण रुग्णालयात दाखल केले. येथे तपासून डॉक्टरांनी ढोबळे यांना मृत घोषित केले. त्यांच्या पश्चात पत्नी, आई, वडील व बहीण असा परिवार आहे. अपघाती मृत्यूने असोला (ढोबळे) गावावर शोककळा पसरली असून हळहळ व्यक्त केली जात आहे.