वादग्रस्त वक्तव्य प्रकरण: गौतम खट्टरचा जामिनासाठी अर्ज; निर्णयाकडे लक्ष

या प्रकरणातील गंभीर आरोप पाहता न्यायालय आता या अर्जावर काय निर्णय घेते याकडे सर्वांचे लक्ष लागले आहे.

लोकमत न्यूज नेटवर्क, पणजी : सेंट फ्रान्सिस झेवियर यांच्याबद्दल आक्षेपार्ह विधान केल्याप्रकरणी अटकेत असलेला संशयित गौतम खट्टर याने बुधवारी वास्को येथील प्रथम श्रेणी न्यायदंडाधिकारी न्यायालयात जामिनासाठी अर्ज दाखल केला आहे. या प्रकरणातील गंभीर आरोप पाहता न्यायालय आता या अर्जावर काय निर्णय घेते याकडे सर्वांचे लक्ष लागले आहे.

वास्को येथे आयोजित एका कार्यक्रमादरम्यान गौतम खट्टरने सेंट फ्रान्सिस झेवियर यांच्या विरोधात प्रक्षोभक आणि अपमानजनक वक्तव्य केले होते. या विधानाचे व्हिडिओ समाजमाध्यमांवर प्रसारित झाल्यानंतर राज्यात तीव्र संतापाची लाट उसळली होती. विविध ख्रिस्ती संघटना आणि सामाजिक कार्यकर्ते, स्थानिक नागरिकांनी या विधानाचा निषेध करत आरोपीवर कडक कारवाई करण्याची मागणी केली होती. खट्टरच्या अटकेसाठी आंदोलने करण्यात आली. राज्यातील धार्मिक सलोखा बिघडवण्याचा हा प्रयत्न असल्याचे सांगत अनेक पोलिस स्थानकांमध्ये तक्रारी दाखल करण्यात आल्या होत्या.

या प्रकरणाचे गांभीर्य ओळखून तपास क्राईम ब्रँचकडे सोपवण्यात आला होता. क्राईम ब्रँचने तांत्रिक पुरावे आणि प्रत्यक्षदर्शीच्या जबाबाच्या आधारे शोधमोहीम राबवून गौतम खट्टरला अटक केली होती. त्याच्यावर धार्मिक भावना दुखावणे आणि समाजात तेढ निर्माण करणे यांसारख्या कलमान्वये गुन्हे दाखल करण्यात आले आहेत.

माधव खट्टरची सुटका

सेंट फ्रान्सिस झेवियर यांच्याबद्दल आक्षेपार्ह विधान केल्याप्रकरणी अटकेत असलेला माधव खट्टर याची अखेर कोलवाळ कारागृहातून सुटका झाली आहे. वास्को येथील प्रथम श्रेणी न्यायदंडाधिकारी न्यायालयाने मंगळवारी त्याला सशर्त जामीन मंजूर केला होता. न्यायालयाने खट्टरला १० हजार रुपयांचा वैयक्तिक जातमुचलका आणि तेवढ्याच रकमेचा एक जामीनदार सादर करण्याचे निर्देश दिले होते. या अटींची पूर्तता केल्यानंतर बुधवारी त्याची कारागृहातून मुक्तता करण्यात आली.