प्रेयसीसोबत हॉटेलमध्ये गेलेल्या तरुणाचा संशयास्पद मृत्यू; बेडजवळ मिळालं औषधांचं पाकीट

एका हॉटेलमध्ये तरुणाचा मृतदेह संशयास्पद अवस्थेत आढळल्याने परिसरात मोठी खळबळ उडाली आहे.

बिहारची राजधानी पाटणा येथील एका हॉटेलमध्ये तरुणाचा मृतदेह संशयास्पद अवस्थेत आढळल्याने परिसरात मोठी खळबळ उडाली आहे. जहानाबाद येथील रहिवासी असलेला संतोष कुमार शर्मा असे मृताचे नाव असून, तो आपल्या प्रेयसीसोबत रामकृष्ण नगर पोलीस ठाणे हद्दीतील एका हॉटेलमध्ये थांबला होता. या घटनेनंतर पोलिसांनी मृत संतोषच्या प्रेयसीला ताब्यात घेतले असून तिची कसून चौकशी सुरू आहे.

काय आहे नेमकी घटना?

मिळालेल्या माहितीनुसार, संतोष हा कामानिमित्त वारंवार पाटण्याला येत असे. याही वेळी त्याने बैरिया बस स्टँडजवळील एका हॉटेलमध्ये रूम बुक केली होती. मूळची पाटण्याची असलेली पण सध्या कोलकाता येथे राहणाऱ्या आपल्या प्रेयसीला त्याने हॉटेलमध्ये भेटायला बोलावले होते. रात्री दोघेही हॉटेलमध्ये एकत्र होते. मात्र, सकाळी अचानक तरुणीने हॉटेल कर्मचाऱ्यांना माहिती दिली की संतोषचा मृत्यू झाला आहे.

खोलीत काय सापडलं?

घटनेची माहिती मिळताच पोलिसांनी हॉटेलवर धाव घेतली. संतोषचा मृतदेह छताच्या पंख्याला चादरने लटकलेल्या अवस्थेत आढळून आला. सर्वात धक्कादायक बाब म्हणजे, खोलीच्या झडतीदरम्यान पोलिसांना काही शक्तीवर्धक गोळ्या आणि औषधे सापडली आहेत. शरीरावर झटापटीच्या कोणत्याही खुणा आढळल्या नाहीत, तरीही बेडवर पडलेली ती औषधे पाहून पोलिसांनी तपास अधिक वेगवान केला आहे.

कुटुंबीयांचा हत्येचा आरोप

संतोषच्या कुटुंबीयांनी या प्रकरणात हत्येचा संशय व्यक्त केला आहे. "संतोषची हत्या करण्यात आली असून यामध्ये त्याच्यासोबत असलेल्या मुलीचा हात असावा," असा थेट आरोप नातेवाईकांनी केला आहे. संतोष यापूर्वीही वेगवेगळ्या मुलींसोबत याच हॉटेलमध्ये येत असल्याची माहिती समोर आली आहे, ज्यामुळे हे प्रकरण अधिक गुंतागुंतीचे बनले आहे.

पोलीस काय म्हणतात?

सदर प्रकरणावर बोलताना एसडीपीओ रंजन कुमार यांनी सांगितले की, "प्रथमदर्शनी हे प्रकरण अत्यंत संशयास्पद वाटत आहे. आम्ही एफएसएल टीमला पाचारण केले असून घटनास्थळावरून वैज्ञानिक पुरावे गोळा केले जात आहेत. पोस्टमार्टम रिपोर्ट आल्यानंतरच मृत्यूचे नेमके कारण स्पष्ट होईल." सध्या पोलिसांनी संतोषचा मोबाईल जप्त केला असून त्याच्या प्रेयसीची चौकशी सुरू आहे. हॉटेलमधील सीसीटीव्ही फुटेजही तपासले जात आहेत.