बेसावध वृध्द महिलेला विकृताने ढकललं रेल्वेट्रॅकमध्ये

दुसऱ्या महिलेशी बोलत बेसावध असलेल्या त्या महिलेला त्याने रेल्वे ट्रॅकमध्ये ढकलून दिले.

ठळक मुद्देएका माणसाने सहज चालता चालता एका महिलेला चक्क रेल्वेच्या ट्रॅकवर ढकलून दिलं. क्षणभर हे काय घडतंय, याची कोणालाच कल्पना नव्हती.

हाँगकाँगमधल्या एका रेल्वे स्थानकावर एक धक्कादायक घटना घडली आहे. एका माणसाने सहज चालता चालता एका महिलेला चक्क रेल्वेच्या ट्रॅकवर ढकलून दिलं. दैव बलवत्तर म्हणून तेथून एकही ट्रेन जात नव्हती. हा सगळा प्रकार सीसीटीव्ही कॅमेऱ्यात कैद झाला असून सोशल मीडियावरही बराच व्हायरल झाला आहे.

हाँगकाँगच्या युन लाँग स्थानकावर हा प्रकार घडला असून ती ५९ वर्षीय महिला स्थानकावर साफसफाई कर्मचारी होती असं सांगण्यात येत आहे. प्लॅटफॉर्मच्या विरुद्ध दिशेला एक महिला उभी होती. पीडित महिला त्या महिलेशी बोलण्यासाठी पुढे आली असता मागून एका निळा शर्ट घातलेल्या व्यक्तीने तिला कसलाच अंदाज न देता ट्रॅकवर ढकलून दिलं. क्षणभर हे काय घडतंय, याची कोणालाच कल्पना नव्हती. ज्या इसमाने महिलेला ढकललं तोही काहीच घडलं नाही अशा अविर्भावात पुढे निघून गेला. सुदैवाने तेथून कोणतीही ट्रेन गेली नाही म्हणून महिलेचा जीव वाचला. मात्र कसलीच कल्पना नसल्याने ट्रॅकवर ढकल्याने तिला जबर दुखापत झाल्याचे सांगण्यात येत आहे.ही घटना घडल्यानंतर त्वरीत पोलिसांनी शिताफीने त्या ५६ वर्षीय आरोपीला पकडलं असून त्याने असं का केलं याचा तपास सुरू आहे. मात्र या घटनेमुळे स्थानकावरीस सुरक्षा धोक्यात आली आहे. अशा विकृतांवर वेळीच नियंत्रण ठेवणं गरजेचं असल्याचं येथील स्थानिक सांगतात.