...म्हणून आईनं चिमुकलीला गळा आवळून संपवलं

मुलीचा खून करणाऱ्या आईला पोलिसांकडून अटक

मडगाव: परदेशात जहाजावर नोकरीला असल्यामुळे पतीशी संवाद नाही. घरी असलेल्या सासूशी पटत नाही, अशा अवस्थेत नैराश्येच्या गर्तेत सापडलेल्या एका मातेने आपल्याच अडीच वर्षाच्या मुलीचा गळा आवळून खून केल्याची घटना दक्षिण गोव्यातील बेताळभाटी येथे घडली असून या प्रकरणात कोलवा पोलिसांनी अझीया रॉड्रीगीस या महिलेला अटक केली आहे.

नागवाडा-बेताळभाटी येथे मंगळवारी दुपारी 1 वाजण्याच्या सुमारास ही खूनाची घटना घडली. बुधवारी त्या मुलीच्या मृतदेहाची उत्तरीय तपासणी केली असता तिचा गळा आवळून आणि हाताने नाक व तोंड दाबून गुदमरुन खून केल्याचे उघड झाले. बुधवारी सायंकाळी या महिलेला फॉरेन्सिक चाचणीसाठी बांबोळीच्या गोवा वैद्यकीय महाविद्यालय रुग्णालयात पाठवण्यात आल्याची माहिती कोलवा पोलीस स्थानकाचे निरीक्षक राहूल परब यांनी दिली. या प्रकरणात आरोपीची सासू सेबेस्तियाना रॉड्रिगीस यांनी कोलवा पोलिसात तक्रार दिली होती.

अझीयाचा पती जहाजावर कामाला आहे. त्याने अझीयासोबतचा संवाद जवळ जवळ बंद केला होता. तिला त्याचे फोनही येत नसत. अशातच तिचे सासूशीही पटत नसल्यामुळे एकाच घरात रहात असून त्यांचा एकमेकांशी संवाद नव्हता. अशा परिस्थितीत कीम या लहान मुलीचा आपल्यावर विनाकारण बोजा पडत असल्याची भावना तिच्यामध्ये वाढत गेल्यानेच ही खूनाची घटना घडल्याचे कोलवा पोलिसांनी सांगितले. 

मंगळवारी दुपारी अझीयाची सासू सेबेस्तियाना शेजारच्या घरात गेली असता अझीया आपल्या एका शेजारणीला घेऊन कोलवा पोलीस स्थानकात हजर झाली होती. सासू आपला छळ करत असल्याचा कांगावा तिने पोलीस स्थानकात केला. दरम्यान, तिची सासू घरी आली असता आपली नात निपचीत पडलेली तिला आढळली. तिला उठवण्याचा प्रयत्न करुनही ती उठत नसल्याचे पाहून तिच्या सासूने शेजाऱ्यांना बोलावून घेतले. सदर मुलगी मृत झाल्याचे दिसून आल्यावर शेजाऱ्यांनी फोनवरुन पोलिसांना वर्दी दिली. त्याही अवस्थेत त्या मुलीला रुग्णालयात आणण्यात आले. पण तिचा त्यापूर्वीचा मृत्यू झाल्याचे डॉक्टरांनी सांगितले.